Manipur activist-in best social reformer of the year award dawng

New Delhi-a 31st Annual Conference and National Achievement Awards neih zawh takah, Manipur mi, rimawi tum thiam leh social activist ni bawk, Dr. Alyson Abonmai chu northeast region aṭanga best social reformer of the year chawimawina hlan a ni.

Liangmai Naga Indigenous Forum (LNIF) tarlan danin, Dr. Abonmai hi ram chhung mai bakah, Northeast huam chhunga mimal anga a ṭha zawnga tha thawh hnem ber pawl leh, award semnaah pawh a langsar ber pawl a nih thu an sawi. Forum hian Covid-19-in harsatna hrang hrang a thlen karah Dr. Abonmai hian chhungkaw 12,850 tan ei leh in tur mamawh zawng zawng a ngaihtuahsak thu an sawi a, environment ṭha leh tlo siam a nih theih nana thing a phun tam bakah, carbon credit chungchanga a hmalakna pawh a nasat thu an tarlang bawk a ni. Heng bakah hian Dr. Abonmai hian tourism, art leh hnam nunphung leh zia vawnhimna kawngah a thawh hlawk hle.

A hnathawh zingah hian Naga thawnthu comic bu-a siam hmasak ber,'The Final Head' tih pawh a tel a, hei hi hnam nungphung leh zia vawnhimna atana a hnathawh langsar tak pakhat a ni. Dr. Abonmai hian khawtlang tana hnathawh a duh tak tak entirna ṭha tak chu Lok Sabha inthlan lo awm tur atana Outer Manipur constituency aṭanga candidate a nihna tur a hnawl ngam hi a ni tiin LNIF hian an sawi.

31st Annual Conference and National Achievement Awards hi Newspaper Association of India buatsaih niin, India hmasawnna leh ṭhatna atana mimal thawhhlawkte chawimawi chu a tum ber a ni.