North-East state hrang hrangah lirthei neitute nuar chhunzawm zel

Sorkar laipuiin Bharatiya Nyaya Sanhita (BNS) dan hnuaia lirthei khalhtuin pawikhawihna a thlen avanga hremna na tak pekna tur dan a siam duh loha dodalna kal zelah Northeast-a state hrang hrangte an nuar chhunzawm zel.

Nawrh lantir nana lirthei tlan duh lote hi sumdawng lirthei an ni tlangpui a, khualzin phur lirtheite chu hmun tam takah passenger la duh loin an ding mek bawk. Meghalaya-a Khasi Hills Tourist Taxi Association general secretary Bhaskar Deb chuan Greater Guwahati Tourist Taxi Association-in an nawrh zawm ve tura an ngenna zawma an nawrh ve thu sawiin, ni 2 tlan lo tura nawrh an huaihawt chu nimin khan tihtawp a ni rih thung. Hetih lai hian state sorkar hnuaia Meghalaya Transport Corporation erawh chuan Shillong leh Guwahati inkarah zan lama an service thu an sawi.

Assam-ah erawh chuan Assam Motor Worker Associations’ Joint Platform huaihawtin nawrh hi kalpui a ni a, sumdawng lirthei tlan chhuak an awm meuh lo a ni. Tripura-ah chuan oil phur truck khalhtute chuan Dharmanagar-ah lungawi lohna lantirin nawrh an huaihawt ve bawk a, accident tawh thu-ah tu mahin an tawn tur an hriat loh thu leh, an duh reng vang a nih bik loh thu sawiin, sorkar chu an dan siam sut leh turin an ngen a ni.