Assam : Guwahati-a sewerage project atan Rs. vbc 1,460 ruahman

Khawpuia chengte khawsak dinhmun chawikang tur leh an thlite mumal zawka sawngbawl a nih theih nan Assam cabinet chuan Guwahati-ah sewerage project kalpui a nih tur thu puangin, he project hnuaia phase 1 hna thawh nan hian Rs, vbc 1,460 ruahman a ni.

Khawpui thli leh bawlhhlawhte lak khawm dan mumal zawk leh sawngbawl dan ṭha zawk ruahman turin cabinet hian Guwahati sewerage project hi JICA puihnaa thawh tur a nih tur thu an tarlang. He project hnuaiah hian bawlhhlawh sawngbawlna hmun pathum; Silsako Beel, Borsola Beel leh Paschim Boragaon te siam a ni dawn a, tin, khawpui thli luanna tur an siam tur thui zawng hi km 872 zeta thui a ni dawn bawk a ni. South Central Guwahati-a in nuai khat leh sing khatte'n an chhawr thei dawn a, zun leh ek sawngbawlna tur a hrana siam a ni dawn bawk a ni.

Assam cabinet hian sewerage project bakah hian thingtlang hmeichhia, mahni kutkawiha eizawnna bul ṭante ṭanpuina tur ruahmanna siam bawkin, self-help group member te hnenah P&RD department hnuaia Assam State Rural Livelihoods Mission (ASRLM) Society kaltlangin Mukhyamantri Mahila Udyamita Abhiyan scheme kalpui a nih tur thu an puang bawk. He scheme hi phase 2-a kalpui a ni dawn a, phase 1-ah hian SHG member-te chu eizawnna bul ṭan nan Rs. 10,000 pek an ni anga, phase 2-ah hian loan, Rs. 25,000 aia tlem lo an lak theih dawn bakah, he loan an rulh hunah hian sorkarin a chanve chu a tumsak dawn bawk a ni.