Manipur : Security force leh helpawlte inkap leh

Manipur-a hnam pahnih inkara nikum May thlaa tualchhung buaina chhuak chuan nghawng la nei zelin Pathianni khan Moreh-ah security force leh helpawlte an inkap leh.

Helpawlte hian zan dar 7 vel aṭang khan Manipur police commando complex hi beiin, police-te hian an kap let a, zan dar 10 vel thleng an inkap chhunzawm niin an sawi. Helpawlte hi mi 10 chuang an nia hriat a ni a, police-te an beih chhan hi hriat a ni lo.

January 2-ah pawh khan helpawlte hian Manipur police commando-te hi beiin, mi pali an hliam a, Border Security Force (BSF) mi pathum an hliam bawk a ni. Hemi bakah hian December 30 khan helpawlte hian Manipur police commando te hi an barrack-ah luh chilhin rocket-propelled grenade te an vawm bawk a, he inbeihnaah hian Kuki National Army (KNA), Kuki National Army Burma (KNA-B) leh united Kuki Liberation Front (UKLF) te chu puh an ni. Moreh-ah hian zan lamah curfew la hman chhunzawm a ni.

Moreh-ah hian security force te beih an ni fo a, a bikin helpawlte hian Manipur police commando te hi an kap fo a ni. Inkahna a thlen fo avang hian khaw chhung mipui zinga volunteer-te chuan Manipur police te chu la chhuak a, sorkar laipui hnuaia paramilitary force te chu dah zawk turin an phut a, state police-te chu chi thliar zawnga tharum thawh ṭhinah an puh bawk.