Manipur : ST aṭanga Kuki leh Zomi paih rawtna sorkar laipuiin ngaihtuah turin state sorkar a hriattir

Manipur-a Scheduled Tribe (ST) aṭanga Kuki leh Zomi paih tura rawtna, sorkar laipuiin a dawn chu sorkar laipui chuan Manipur sorkar hnenah zir chianna neia ngaihtuah turin state sorkar a hriattir. Union tribal affairs ministry chuan ST aṭanga Kuki Zomi paih tura rawtna hi Imphal-a Republican Party of India (Athawale), national secretary, Maheshwar Thounaojam-a'n a theh lut niin an tarlang.

Maheshwar Thounaojam hian Tribal Affairs Minister, Arjun Munda hnenah December 11, 2023 khan lehkha theh lutin he rawtna hi a thlen a, January 2011-a Supreme Court-in thubuai pakhat a remna ṭanchhanin, Scheduled Tribe zawng zawng chu ram leilung fa dik tak an ni tur a nih thu leh, Kuki-Zomi te chu Manipur ram leilung fa dik tak an nih loh avanga Scheduled Tribe-a pawm theih an nih loh thu a sawi a ni. Thounaojam-a lehkha theh luh hi phek 17 zet a ni a, ram leilung fa nihna chu tribal nihna tehfung a nih tur thu te, chung avanga Meitei pawh Scheduled Tribe-a telh an nih a ṭul thu te a tarlang bawk a ni. "Manipur aṭanga ST list-a dah luhte en hian, 'Any Mizo (Lushai) tribes', 'Zou' leh 'Any Kuki tribe' tiha tarlan a ni a, heng hi a fiah loin sawi buai theih a ni. Hnam sawi bik a neih loh avangin ṭhenawm ram dang aṭanga dan loa lo lutte tan himna a pe zawk a ni" tiin a tarlang.

December 26, 2023-a lehkha pek chhuah aṭanga a lan danin sorkar laipui hian ST list-a indah luh belh leh inpaih chu an awmna state sorkarin rawtna a thlen chauha ngaihtuah theih a nih thu tarlangin, hei vang hian ST list aṭanga Kuki leh Zomi paih chungchang pawh hi Republican Party of India (Athawale) hian sorkar laipui hnenah thlen mah se, state sorkar hnena hriattir thlen chhawng ve leh an nih thu an tarlang a ni.

Sorkar record aṭanga a lan danin ST-a Meitei dah tumna hi 1982 khan Office of the Registrar General of India chuan ṭum khat a lo hnawl tawh a, 2001 khan sorkar laiin an lo hnawl tawh bawk a ni. RGI hian Meitei-te chu tribal an nihna sawi fiahna tur engmah a awm loh thu leh, 2001-a Manipur sorkar pawh hian Meitei te chu Manipur-a hnam tam zawk niin Other Backward Classes (OBC)-ah telh an nih tawh thu an ṭanchhan ve bawk. 2023 chhung zawng khan Manipur-a Meitei pawl hrang hrangte chuan Scheduled Tribe-a Meitei dah luh phutin kawng hrang hrangin hma an la a, Kuki-Zomi te Scheduled Tribe list aṭanga paih rawtna erawh a luh vawi khatna a ni.