Assam : Saiin mihring a beih ṭhin ven nan solar fence siam

Assam, Udalgiri district-a No. 3 Kundarbil khuaa kilometre 7-a thui solar fence siam chu hawn niin, hei hi Sai sualin mihring an beih ṭhin tihtlem nan leh hemi laka inven nana siam a ni.

Solar fence hi ramngaw leh nungcha humhalhna kawnga hma latu pawl; Aaranyak leh Assam forest department ṭangkawpin an siam niin, khaw mite hian an enkawl chhunzawm dawn a, an kuta pek a nih hma hian khaw chhunga solar fence committee, Forest department leh Aaranyak te hian Memorandum of Understanding (MoU) an ziak a ni. He solar fence hi mihring nunna tam tak leh in leh lo himna tur a nih dawn bakah chhungkaw 170-te eizawnna hnar, huan thlaite an him theihna tura ngaih a ni.

Solar fence-te hi nikum December 28 khan khaw mite kutah hlan a ni tawh a, Village Council Development Committee chairman, Patrosh Daimary chuan heng solar fence te hi Rupa LP school ground-ah tlangzarhin, a siam hna hi Aaranyak-a solar fence lama mithiam; Anjan Baruah chuan a thawk a ni. Fence hawn a nih hian Baruah hian enkawl chhunzawm dan tur leh, solar fence chungchanga mipuiin an hriat ngaite hrilh hriatna a nei nghal bawk a ni.