Nagaland-a club upa berin an din cham 106-na hmang

Lotha Hoho buatsaihin Pathianni khan Nagaland-a club upa ber - Naga club chuan Wokha district-a wokha town conference hall-ah an club din cham vawi 106-na an hmang.

Naga club advisor, Medoselhou Keretsü chu guest speaker atan hman niin kal khawmte hmaah hian thu a sawi a, kum 100 aia upa club chu Naga mipuite inpumkhatna hmanrua leh khawtlang leh politics-a tha thawhtu pawimawh tak an nih thu a sawi.

Naga club hi 1918-a din kha niin, club upa tawh tak ni mah se hruaitu mumal tak nei loin kum 64 chhung an kal a, club enkawltu leh kaihruaitu atan hian dictrict commissioner -te an ring mai ṭhin a ni. 1982, January thla khan Kohima khuaa Naga elders general conference chuan, Pesilie Suokhrie kaihhruaina hnuaiah Naga club chu dan ang taka la lutin, hruaitu inthlanna an nei chauh a ni tiin Keretsu hian a tarlang. Keretsu hian Naga mipuite inzawm khawmna pawimawh tak hna thawkin Naga club chuan Naga mipui zawng zawng aiawhin, January 10, 1929-ah, John Simon-a kaihhruai British Statutory Commission hnenah 'The Naga Political memorandum' an lo theh luh tawh thu te a sawi a, chu hun pawimawh tak chu kum tin Naga day atana an hman chhunzawm tak thu a sawi bawk.