ULFA-ten BJP leh AGP vau

United Liberation Front of Assam Independent (ULFA (I)) chuan Assam state assembly election lo awm turah Bharatiya Janata Party (BJP) leh Asom Gana Parishad (AGP) party te chu an thil phut an tih hlawhtlinskak loh chuan an lakah chet an lak tur thu an sawi. Hei vang hian BJP leh AGP tangrual te chuan Eastern Assam huam chhungah venhimna khauh zawk kengkawh turin thu neitute an ngen.

ULFA(I) Commander-in-chief, Paresh Barua chuan BJP leh AGP hruaitute chu an thil phut pasarih tihlawhtling turin a hriattir a, an thil phut erawh tarlan a ni lo. ULFA(I) te hian BJP leh AGP ṭangrual chu Estern Assamah hian candidate nei lo turin an lo hriattir tawh nghe nghe a ni.

Assam DG Mukesh Sahay chuan helai bialah hian security force te chuan venhimna khauh taka an kalpui thu a sawi a, hlauhthawn tur a awm lo niin a sawi. Hetih lai hian BJP leh AGP te chuan helai bialah hian Bangladesh aṭanga pem lut an tam avangin khua leh tui dik takte hum chu an tih tur a nih thu an sawi a, ULFA (I) te vauna chu an ngai pawimawh lutuk lo niin a lang a, campaign pawh an kalpui zel niin Himanta Bishwa Sarmah chuan a sawi. ULFA(I) te hian BJP state president leh chief ministerial candidate ni bawk Sarbanada Sonowal leh amah campaign puitu Himanta Bishwa Sharma te chu Margherita LAC-ah an party ticket-a ULFA mi leh sa din tir ve turin an nawr niin an sawi bawk.

Kum 1990 bawr khan AGP chuan Assam-ah sorkarna an chang a, BJP chuan sorkar laipui-ah NDA sorkar a din a, hetih hun lai hian ULFA mi leh sa Bhaskar Sarmah chu thah a ni. He thil thlen chhanah hian AGP leh BJP te chu an puh a, hei vang hian ULFA (I) te chuan mipuite hriatah ngaihdam dil turin party pahnih hruaitute an phut. Hei bakah hian BJP chu Assam CM hlui leh AGP hruaitu ni bawk Prafulla Kumar Mahanta leh AGP mi leh sa Chandra Mohan Patowary bakah Padma Hazarika te chu Bhaskar Sarmah thahna-na ah khan an inhnamhnawih em tih fiah turin an phut bawk niin an tarlang.

Assam state election a hnai tawh hle a, hetihlai hian mi tam tak chuan venhimna lam a ṭha tawk lo niin an ngai a, an hlauthawng ru hle. Hetih lai hian helpawl inzawmkhawm ṭhenkhat chuan buaina siam an tum thu an sawi a, venhimna pawh fimkhur zawka kalpui a ṭul thu inthlan buaipuitu te chuan an sawi.