SBI Digital Branch hmasa ber hawng

Meghalaya Chief Minister Dr Mukul M Sangma chuan Nilaini khan hmarchhak biala State Bank of India Digital Branch hmasa ber chu State Bank of India, Main Branch hriatpuinain Shillong-ah a hawng.

SBI Digital Branch thar hawnnaah hian Sangma chuan thu sawiin, SBI leh a bik takin hmarchhak state tan thil chhinchhiah tlak tak a ni a ti a, mipuite chuan awlsam zawk leh kawng engkima changkang zawkin Bank an dawr thei tawh dawn a ni, a ti.

Digital branch-ah hian awlsam zawkin Internet banking, Internet savings, mobile banking leh thil dangte a tih theih dawn a, him zawk tura ngaih a ni bawk. SBI lam hian an mahni dawrtute tan Financial Literacy programme an buatsaih sak theih chuan a ṭangkai hle dawn niin Mukul chuan a sawi a, micro leh small entrepreneur te tan a ṭangkai dawn hle niin a sawi.