Police-ten Sharmila hmuh tum zirlaite an dang

Delhi Police-te chuan Nilaini khan New Delhi-a Manipur Bhavan-a Human rights activist Irom Sharmila hmuh tuma kal, Manipur zirlai za chuang zet chu an luh phalloin an lo dang.

Irom Sharmila lakah hian kum 2006-a Jantar Mantar-a chaw ngheia nawrh a huaihawt avangin Delhi court-ah mahni intihhlum tuma puhna thubuai a ziakluh a ni. Delhi High Court-ah inlan tura tih a nih hnuin, Nilaini zing khan court chuan a thubuaiah hian thiam a chantir a ni. Sharmila (42) hian kum 16 chuang zet Manipur-a Special Powers Act (AFSPA) hman chu hlih a nih theih nan chaw a nghei tawh a ni.

North-East Forum for Interna-tional Solidarity (NEFIS) leh Jawaharlal Nehru University Stu-dents Association te chu Mani-pur House kawtah hian an pungkhawm a, Sharmila thlavang hauhin AFSPA hlih a nih theih nana beihpui an duh a ni. Sharmila chu heng zirlai a thlavang hauhtute hmuhna hun reilote pek a ni.

JNUSU vice president Shehla Rashid chuan, Irom Sharmila-in AFSPA hlih a nih theihna tura a beihna chu ropui a tih tak zet thu a sawi a, "Vawiin ni hian hnehna chu a chang ta a ni", a ti. Hei hi hnenhna tluantling chu a la nilo, amaherawh chu AFSPA hlih a nih theih nan hian a tawp thlengin a lamah an ṭan zel tur thu a sawi bawk.

Sharmila chu zirlai te hmaah hian thusawi phalsak a ni lo a, zirlaite hian Manipur Bhavan aṭanga South Asian University Gate thlengin kawng an zawh zui a ni. Manipur Students Association hruaitu Seram Rojesh pawhin, Prime Minister Narendra Modi-an kum 2014 a Manipur a tlawh tum khan Sharmila hian Modi chu hmuh a duh thu ziakin a lo thlen a, Sharmila chu Delhi-ah a kalin Modi hmuh a duh thu a hrilh a, nimahsela Modi khan engvanga Sharmila kha hmu duhlo nge a nih tiin a zawt a, media mite chu Sharmila a hmuh duhlo h chhan zawtchhuak turin a ngen bawk.