Tripura : Thla 32 chhungin mibo report 4,159 awm

Tripura police chuan January 1, 2021 aṭanga August 31, 2023 chhungin mibo report 4,159 an dawn thu an sawi. Heng mibo zinga 3,629-te hi hmuh an ni tawh a, midang 530-te erawh tun thlenga hmuh an la ni lo niin an tarlang.

Hemi chungchang hi Tripura assembly winter session neih meka state home department-in ziaka zawhna an chhannaa tarlan a ni a, lehkhaa a lan danin 2021 chhung khan mi 1,593 an bo niin report dawn a ni a, 2022-ah mibo 1,516 awmin, 2023-ah thla riat chhungin mibo 1,050 report an dawng bawk a ni.

Police hotute chuan mibo chungchangah hian pawisa phuta inruk bona a awm loh thu leh, inngaizawng inru tlan bo an tam ber thu sawiin, Tripura-a police station tam takah chuan innei tawh, inneihna pawn lama harsatna an tawh avanga tlan bo an awm ṭhin thu a sawi bawk. District superintendent of police chuan mibote hi media-a theh darhin, lehkha tar turte an buatsaih ṭhin a, state dangah pawh an intir chhuak hial ṭhin a ni. Police hotute chuan cyber unit leh forensic hmanga electronic thilte an chhui aṭangin mibo tam zawk hi an hmuh leh theih ṭhin thu an sawi bawk.