Nagaland : Thanamir khuain Mt. Saramati neitua Tikhir hnamte inchhalna sawisel

Nagaland-a Thanamir village council, Thanamir village citizenship leh Thanamir village students' union te chuan Tikhir Naga tribe-te'n Mt. Saramati neitu anga an inchhalna chu sawiselin, Tikhir hnamte ta a nih bik loh thu an sawi.

Thanamir village council, Thanamir village citizenship leh Thanamir village students' union te chuan thuchhuah inṭawm siamin, Tikhir students' union anthem tlar hmasa bera Mt. Saramati chungchang tarlanna awm, “Langkong-Shamator,tong Saramati vong kyan” lehlina “from Langkong- Shamator to Saramati mountain” (Langkong Shamator aṭanga Saramati tlang thlengin) tih chu Tikhir hnamte ram anga chhalna a ni tiin,"Hemi thu-ah hian thil hriat tel ngai chu, Saramati hi Thanamir khaw enkawla awm a ni. Thanamir hi Chirr ṭawng hmangtu, Yimkhiung Naga hnamte chenna a ni a, ram neitu leh rochuntu an ni," tih thu an tarlang.

"History en letin Mt. Saramati hi Chirr ṭawnga Meramkhanvong tiin he tlang hmuchhuaktu, min thlahtu kan pi leh pute khan a hming an lo phuah a, a hnuah Mt. Saramati tih hi a pu chauh a ni. Hei vang hian Naga hnam tute pawhin hming inṭawm anga neiin Mt. Saramati hi hman a ni a, mahse, council hian he hming hmanga ziakin emaw, thu phuah emawa neitu nihna inpek tum an awm erawh chuan kan dodal tlat a ni" an ti. Thanamir joint council hian Tikhir students' union-in Mt. Saramai neitu anga an inchhalna chu an dodal thu sawiin, an anthem phuah aṭanga Saramati tih thu chu paih tura an phut thu leh, January 11-14 chhunga Pokphur khuaa Tikhir students' union session vawi 43-na hman hma ngeia paih tura an phut thu an sawi bawk.