Manipur : Mi pali bo, Haotak khuaah police leh helpawlte inkap

Manipur, Kumbi constituency chhunga cheng mi pali; Dara Singh, Ibomcha Singh, Romen Singh leh Anand Singh te chu police te chuan Nilaini khan an bo niin an tarlang. Heng mi palite hi Bishnupur leh Churachandpur district tlang bul ṭhut velah thing tuah tur fawm turin an kal niin an sawi.

Tun thlengin an awmna chin hriat a la ni lo a, police-te chuan helpawlin ruin, an kawl pawh thil ni thei a nih thu sawiin, sorkar laipui hnuaia sipaite puihna an dil bawk a ni.

Hetih lai hian Bishnupur district-a Haotak khua chu helpawlin silai leh bomb hmanga beiin, nu leh naupang 100 chuang chu hmun him lama tlanchhiain an khua an tlansan. Helpawlin Haotak khua an bei tih hriat a nih rual hian police leh sipai eng emaw zat chu a hmunah hian an kal nghal a, helpawlte hi an kap let ve nghal niin an sawi. Thi leh hliam an awm hriat a ni lo a, he thu buatsaih lai thleng hi chuan police leh helpawlte hi an la inkap chhunzawm reng a ni.

Churachandpur leh Tengnoupal-ah ralthuam man

Churachandpur leh Tengnoupal district-a venhim hna thawktu sipaite chuan joint operation neiin ralthuam chi hrang hrang leh silai mu ṭhahnem tak an man thu an puang. Ralthuam an man zingah hian AK-56 bakah, carbine rifle leh bomb te pawh a tel a ni.

Sipaite hian Churachandpur leh Tengnoupal chhehvela helpawlte chetna tura an rinhlelh leh a ruk a rala che tur laka inven nan dap hna an kalpui a, ralthuam thuhrukte hi an man ta zawk a ni. Manipur-ah hian boruak ṭha chho zel mah se, a la ralmuang kim lo a, inkahna leh inbeihna thawm a khat tawkin hriat tur a la awm reng a ni. Hei vang hian venhimna hna thawktu sipaite pawh inralringin an la awm reng a ni.