Tripura : Assembly neih lai aṭangin CPIM leh Congress MLA-te chhuak tau

Tripura assembly thlasik inkhawm neih mekah private university bill pass tak duh loin eptu party MLA, CPIM leh Congress-a mite chu session neih lai aṭangin an chhuak tau.

Eptu party-te hian private university bill chungchangah hian committee dina, committee dinin zir chianna nei phawt se an duh thu an sawi laiin, Tripura-a rorel lai BJP leh IPFT ṭangrual pawl chuan majority an neih avangin an pass ta tho a ni. Debbarma chuan mimal anga university emaw zirna in din duh an awm a nih pawhin anmahni zir chianna leh fiahna mumal tak kan nei hmasa tur a ni, university din tum, mimal chuan a nih tur ang a ni pha vek em tih leh, university din tura thil ṭul zawng zawng a nei vek em tih kan hriat a ṭul tiin a sawi. "Agartala Holy Cross College tih loh hi chuan NAAC review-ah khawi zirna in mahin grade A an hmu pha lo a, college kan ngah ngaihtuahin hei hi a lungchhiatthlak tak zet a ni. Principal nei lo college an awm tihte kan hria a, heng zawng zawng ngaihtuah hian mimalin zirna in din kan phalsak hma hian uluk taka ngaihtuah a ngai a ni" a ti.

CPIM MLA, Jitendra Choudhury pawhin,"Tripura-ah hian ICFAI university hi a lo lut hmasa ber tih hi house member-te'n hria ila ka duh. State assembly-ah hian 2005 khan bill a lo lut a, mahse, vawi eng emaw zat committee dinin committee hnenah thlen phawt zel a ni. 2010-ah bill chu pass a ni ta chauh a, tunah chuan kan state-a university ṭha ber pawl a ni ta reng a ni. Hetiang zelin Maharaja Bir Bikram University bill pawh committee dina ngaihtuah phawt a ni. Heng bill hi zirlaite hmakhua nen a inzawm tlat avangin sorkar pawh hian uluk zawkin ngaihtuahna seng se kan duh," tiin a sawi ve bawk.

House-a bill pharhtu, chief minister Manik Saha chuan Mata Tripura Sundari open university chu an state-a open university hmasa ber a nih tur thu sawiin, hna nei tawhte pawhin online emaw, offline pawha zirna sang zawk zawma an zir zawh ve theihna tur a nih thu a sawi. "State sorkar hian pawisa engmah kan tumsak dawn lo a, university-te hi anmahni an intungnung dawn a ni. Hmunhma sakna tur ram lei fel tawh a ni a, Delhi-a The Himalayan Universal Educational Foundation te chu a bultumtu turte an ni. Tripura mai bakah Uttar Pradesh, Madhya Pradesh, Sikkim, Arunachal Pradesh leh state dangah te pawh he foundation hian zirna in ṭha leh hlawhtling tak tak an lo din tawh a ni," a ti.