Gadkari-a'n Manipur-a NH project lungphum a phum
Union minister for road transport, highways and MSMEs Nitin Gadkari chuan Thawhṭanni khan video conference kaltlangin, New Delhi aṭangin Manipur-a highway project 13 lungphum a phum. Hemi rual hian road safety project pawh a hawng nghal bawk.
National Highway project hrang hrang thawhna atan hian cheng vaibelchhe 3,000 ruahman a ni a, kawng kilometer 316-a thui siam a ni ang. Minister chuan sorkar laipuiin Manipur state-ah project dang eng emaw zat, cheng vaibelchhe 12,023 man siam belh a la tum tih a sawi.
Delhi-a cham mek, Manipur chief miniter N Biren Singh chuan Manipur Bhawan aṭangin project lungphum phumna inkhawm, virtual function hi a kaihruai a ni. He function hi Minister of State for the Development of North Eastern Region Jitendra Singh, Minister of State for Road Transport and Highways V K Singh bakah state cabinet minister-te pawhin an hmanpui a ni.
Union minister chuan state sorkarin Imphal khawpuia kawngpui chhawng siam a rawt angin a siamna tur lungphum pawh phum thuai tum a ni a, DPR buatsaih mek a ni, a ti. Sorkar laipui chuan prime minister Narendra Modi-a'n hmarchhak bial infrastructure tihhmasawnna a duhna tipuitling turin project hrang hrang a duang a ni, a ti.
Central Roads Fund (CRF) chung changah, state sorkar hnen aṭanga a hna thawh tawhnate certificate hmuh a nih hunah additional fund, cheng vaibelchhe 250 pek chhuah a ni dawn tih Gadkari chuan a sawi bawk. CM Biren Singh hnenah pawh road project-te kalpui an nih thuai theihna tihtur ṭulte tifel thuai turina chah a ni.