Assam sorkarin Bharat Jodo Nyay Yatra zan chawlhna tur phalsak lo

Congress chuan Bharat Jodo Nyay Yatra neia state an tlawh kualna turah Assam district pahniha zana chawlhna tur an ruahmanna hmunah Assam sorkarin phalna a pe thei lo niin an sawi.

Bharat Jodo Nyay Yatra hi Rahul Gandhi kaihhruaia Congress hruaitute'n Lok Sabha inthlanpui lo awm tur puala an inpuahchahna pakhat atana India ram state 15, ke leh bus hmanga tlawh chhuah an tumna a ni a, mahse, state an tlawh tel tura zinga mi, Assam sorkar chuan zana an state chhunga chawlh hi a phalsak lo a ni. Hemi chungchangah hian eptu party hruaitu, Debabrata Saikia chuan an party-in kawng dang an zawn mek thu leh, mimal ram, an hotute'n zan riaka hun an hmanna tur dawl thei tur an zawn thu a sawi.

Saikia chuan,"Dhemaji district-ah Gogamukh sikul tual chu zan kan riahna tura kan lirthei leh in tete dah nan kan dil a, a tirah phalna pek vek tawh kan ni a, tunah hian an phal lo hnuhnawh leh a ni. Hetiang tho hian Jorhat district-a college pakhat pawhin zan khat chiah kan riahna atan an hmunhma hman min phalsak lo a ni," a ti. Saikia hian phalna pek an nih loh chhan chu BJP-in an dikna chanvo rahbehsak a tum vang nia sawiin, district dang dangah pawh phalna an neih dan chin an hriat loh thu leh, mimal anga zan an chawlhna tur atana lo pui thei tur an zawn chhunzawm zel thu a sawi tel bawk.

Bharat Jodo Nyay Yatra hi January 14-ah ṭan tur a ni a, Assam-ah hian January 18-25 chhung hun hmang tura ruahman niin, March 20-ah Mumbai-ah tihtawp a ni dawn a ni. He yatra-ah hian ni 67 chhungin km 6,713 kal chhuah hman tum a ni a, state 15-a district 110 te tlawh tum a ni.