Manipur : Oil bua luia luang lut avangin mipui chiai

Manipur sorkar chuan Ningani khan thuchhuah siamin, luia luang lut, oil bua a awm thu an puang. Oil bua hi army camp bula thleng niin, Leimakhong bula awm, Kanto Sabal leh Khurkhul vela mihring leh ran khawsate chuan tui in turah harsatna tawk thei dinhmunah an ding a, he lai hmun hi Indian Army 57th mountain division te awmna a ni bawk a ni.

Oil bua chungchang hi Nilaini tlai khan a chhehvel khaw mipuite'n oil rim an hriat aṭanga report dawn a ni a, tun dinhmunah eng ang chiaha nasa nge tih leh, luia oil bua a luan luh chhan hi mumal taka hriat a la ni lo a ni. Hetih lai hian ṭhenkhat chuan lui hnar lamah mi tute'n emaw oil hi tihluihnain an paih nia ring an awm bawk. Oil luhna lui hi Kanto Sabal leh Khurkhul vela chengte chuan rinrawl bera an neih a ni a, ni tin mamawh bakah in tur atan pawh an hmang bawk a ni. Hemi chungchangah hian Manipur sorkar chuan FIR theh luh a nih tawh thu tarlangin, thil thlen dan leh thlen chhan mumal taka hriat a nih theih nan chhui zui nghal a nih thu an sawi.

Luia oil bua a awm thu report dawn a nih rual hian Public Health Engineering Department (PHED) member bakah, Agriculture, Environment and Climate Change, Water Resources, Power, Veterinary and Animal Husbandry leh Fisheries department aṭangtein member inkoh khawm a ni a, meeting neih nghal niin, mipui in tur tui thianghlim ngaihtuah dan tur an sawiho a ni. Hemi chungchangah hian state sorkar chuan a kaihhnawih department zawng zawngte pawh a rang lama harsatna sutkian dan tur ngaihtuah turin a hriattir tawh bawk.