Meghalaya : India khawpui boruak bawlhhlawh berah Byrnihat

Centre for Research on Energy and clean Air (CREA) chuan tun hnai khan zir chianna neiin, 2023 chhunga India rama khaw hrang hrang zingah Meghalaya-a Byrnihat chu boruak bawlhhlawh ber a nih thu sawiin, Bihar-a Begusarai leh Uttar Pradesh-a greater Noida te chuan an dawt a ni.

CREA tana South Asia-a analyst, Sunil Dahia chuan 2023-a ni 75 chhung boruak dinhmun en theih awm khawpui 227 te zir chianna neih a nih thu sawiin, heng khawpui zinga 85-te hi National Clean Air Programme (NCAP)-ah an tel niin a tarlang. Byrnihat khua pawh hi NCAP hnuaia tel a ni a, boruaka PM10 tam lamah an sang ber a, kum 2023 chhung khan PM10 hi 301 micrograms per cubic metre a ni hial a ni. Khawpui boruak bawlhhlawh zual thlan chhuah 50 zingah hian Bihar aṭangin 18 an tel bakah, Haryana aṭangin pariat leh Rajasthan aṭangin pariat bawk an tel a ni.

NCAP hi 2019 khan tlangzarh niin, 2024 hmaa boruaka PM2.5 leh PM10 te 20% tala tihhniam chu an tum ber a ni a, he an thil tum hian 2011 aṭanga 2015 chhunga boruak ṭha pangngai dinhmun nei pha lo khawpui 131 te a bitum bik a ni. Tunah hian sorkar laipui hian hmachhawp thar neiin, PM concentration chu 2026 hmaa heng khawpui bika 40% tala tihhniam a tum a ni.