Nagaland : Mini olympic hmasa ber hmang

Nagaland-a Rengma hnamte chuan a vawi khatna atan Rengma Sports Association (RSA) buatsaih, Mini olympic 2024 chu Tseminyu-a RSA tualah Ningani khan an hmang.

Mini olympic hawngtu leh chairman ni bawk, adviser to chief minister, IDAN, Abu Metha chuan mini olympic hawnna hun hi hmangin Rengma hnamte chu state ṭhatna atana an tha thawh zawng zawngah chhuanawm a tih thu a sawi. Metha hian sorkarin infiammite tana hmathlir a neihte sawiin, infiamna hmanrua leh hmunhma chauh ni loin, infiammite pawhin hmasawnna an neih theih nan hmalak a ngai niin a sawi. Mini olympic hawnna hunah hian Metha hian Taekwondo huang aṭangin; Kitenlo K Thono, Gwahilo Kent, Tegsonye Lorin leh sepaktakraw huang aṭangin Jwensinle Kesen te chu ram chhung leh khawvel huapa hlawhtlinna an chan hrang hrang avangin chawimawina a hlan nghal a ni.

RSA buatsaih, infiamna hmanga intihsiaknaah hian Kasha Daho, Kandi Sports Association, Tsogin Range Sports Association, Tseminyu Tsipwen Kecho Logwa, Phenshunyu Lowjvu Sports Association, Tesophenyu Group Sports Association, leh Kithagha Sports Association aṭangtein infiammi eng emaw zat an tel a ni.