Sikkim-ah Covid19 hri kai hmuh belh
Sikkim-ah Covid-19 kai mi 20 hmuh chhuah belh leh niin, heng mite nen hian hri kai hmuh tawh hi mi 1,187 an tling tawh.
East Sikkim chu district zingah hri kai tamna ber an ni a, hri kai 684 an awm. South Sikkim-ah mi 460, West Sikkim-ah 42 leh North Sikkim-ah hri kai hi pakhat an bawk a ni.
Hri kai hmuh tawh zinga mi 701 chu enkawl dam ni tawhin, mi pakhatin a thihpui tawh a, enkawl mek mi 485 an la awm. Thawhṭanni thleng khan state chhungah sample 34,183 test a ni tawh bawk.
AP-ah hri kai thar 43 awm
Arunachal Pradesh-ah pawh hri kai hmuh thar mi 43 an awm leh a, an state-ah hri kai 2,701 hmuh an ni tawh a ni.
State Surveillance Officer Dr L Jampa chuan hri kai hmuh thar zinga mi 14 chu paramilitary foce mi leh sa an ni tih sawiin, August 1 aṭang khan state chhunga security force mi 548 in hri an kai tih hmuh chhuah a ni tawh a ni, a ti.
Thawhṭanni khan hri kai dam tawh, mi 37 chu enkawlna hmun aṭangin chhuah tir an ni bawk a, hri kai enkawl dam tawh hi mi 1,808 an awm tawh. State recovery rate pawh 66.93% a tling tawh. Thawhṭanni thleng khan sample 1,24,786 test a ni tawh bawk.
Nagaland-ah Covid-19 kai 3,455 tling tawh
Nagaland-ah Covid-19 kai an pun belh zel a, nimin thleng khan hri kai hmuh chhuah hi mi 3,455 an tling tawh a ni. Health and family welfare minister S Pangnyu Phom chuan hri kai hmuh thar hi mi 61 awm lehin, an zinga 30 chu armed forces mi leh sa an ni tih a sawi. Hri kai hmuh tawh zinga 1,530 chu enkawl dam an ni tawh a, mi pariatin an thihpui tawh bawk.