Manipur : Oil bua chungchangah CM-hoin high level meeting nei

Manipur, Leimakhong-a oil bua chungchang dinhmun thlir a, sawihona neiin Manipur chief minister, N. Biren Singh kaihhruaina hnuaiah high level meeting neih a ni. Meeting hi chief minister's secretariat-ah neih niin, chief secretary, Dr. Vineet Joshi te, IIT-a zirtirtute, Indian Coast Guard leh department hrang hrang official-te an tel a ni.

Leimakhong-a oil bua chungchangah hian state sorkar hian rang takin hma a la a, a bul hnaia lui teah te luang lut hman mah se, tun dinhmunah chuan a nghawng zel tur an veng tawh niin an sawi. Oil bua dinhmun chhui chiang tur hian mithiam awmna team dinin, thil thlen dan chhui a, lui tui a tihbawlhhlawh dan chin leh a chhehvel a nghawng dante zir tura tih an ni. Hei bakah hian Leimakhong-ah hian venhimna khauh zawk kalpui mek a ni bawk.

Oil bua hi January 10, 2024 khan Leimakhong power station aṭanga bua niin an tarlang a, hei vang hian a bul hnaia luiah te oil hi luang lutin, heng luite hi Kantosabal leh Sekmai ahte a luang lut leh a ni. Oil bua kaihhnawihah hian FIR theh luh a ni tawh a, helai chhehvel hi tu mahin an tlawhpawh theih loh turin venhim a ni bawk. Thil thlen dan chhui chiang tura team an din hi Manipur ADGP (Int), Ashutosh Sinha chuan a kaihruai a, ani bakah hian Power commissioner, Shailesh Kumar Chourasia te, Additional home secretary, M. Pradip Singh te an ni. Police-te'n an hriat tawh chin aṭanga an sawi danin, Heavy Fuel Based Power Plant (HFBPP) rawkna leh suasamna a thlen hnuah pawikhawihtute hian oil hi an tibua niin an sawi.