Taralango, Assam-ah Karbi youth festival hmang

Karbi Cultural Society (KCS) buatsaihin, Karbi Youth Festival (KYF) golden jubilee chu Inrinni khan Taralango-a Karbi People's Hall (KPH)-ah hman ṭan a ni. Taralango hi Anglong district khawpui, Diphu aṭanga km 7-a hlaa awm a ni.

Karbi Anglong Autonomous Council (KAAC) chief executive member (CEM), Tuliram Ronghang chuan festival hi hawngin thu a sawi a,"KYF hmasa ber hmang tura Roy Inghi leh Lunse Timung te hmalakna kha ka hre reng a ni, anni bul ṭanna zarah Karbi culture leh tihdan phungte chhawm nun zel a la ni. Taralango hi a danglam tawh hle a, Karbi-te tan cultural centre a ni tawh a ni. Kan ṭanho tlat chuan India danpui, article 244(A) hnuaia kan thil phut, Autonomous state hi kan la nei ngei ang," tiin a sawi.

Festival-ah hian KCS zone 35 aṭangin ṭhalai 3,000 chuang an pung khawm a, an vai hian Karbi Anglong district leh district dang aṭanga hnam ziarang phochhuak tura kal an ni. Hnam ziarang phochhuaka kawngzawhna hi Karbi club leh Rongnihang khaw mite'n an kaihruai a ni. KCS president, Kro chuan flag pawh parhna neiin, KCS central choir-te'n KCS anthem an sa bawk. Karbi Youth Festival hi President Droupadi Murmu chuan January 17 hian a hmanpui dawn bawk a ni.