AP : Parshuram Kund kut hmang ṭan

Kum tina hman ṭhin, Parshuram Kund Festival 2024 chu Arunachal Pradesh-a Wakro-ah hman ṭan a ni. Parshuram Kund kut hi Arunachal Pradesh deputy chief minister, Chowna Mein chuan a hawng a, hawnna hunah hian Lok Sabha MP, Tapi Gao bakah, MLA Chau Zignu Namchoom, Talem Taboh leh Dasanglu Pul te, SJETA secretary, Abu Tayeng, Lonit DC, Shashvat Shaurabh leh SP, Minjom Ete te an tel bawk a ni.

He kut hi Hindu thawnthua Parsurama nen inzawmna thuk tak nei nia sawi a ni a, Lohit district-a Kamlang reserve forest-a awm a ni. Thawnthuah chuan puithiam Parsuram-a chuan a nu a thahna sual aṭangin Brahmakund-a Lohit luiah hian a intleng fai a ni. Hmun hrang hrang aṭanga kut hmanga lo kalte hian he luiah hian sual tleng faia inhnim turin an kal khawm ṭhin a, a bik takin Makar Sankranti pualin an kal khawm ṭhin deuh bik a ni.

Parshuram Kund festival 2024-ah hian ram pum huapin dawr te chi hrang hrang hawn a ni a, state dang aṭangin dawr siam eng emaw zat an tel. Ei leh in zawrhna dawr te siam a ni a, Arunachal Pradesh-a ei phung chi hrang hrangte lei theiha siam a ni bawk. PHE leh Water sanitation department chuan festival neih chhung atan hian bio-tiolet an buatsaih bakah, Indian army-te chuan kut hmangtute'n harsatna an tawh palha enkawlna tur medical camp an buatsaih bawk.

He kut hmanga kal, pilgrims (hmun thianghlim tlawhtute) te chu ei leh in a thlawna pek an nih bakah an riahna tur ngaihtuahsak an ni a, tluang taka kut an hman theih nan venhimna pawh khauh taka kalpui a ni. Kut hman ṭan ni hian tlawhtu mi 5,000 chuan an awm niin an tarlang.