Manipur-ah inkahna thleng, police pakhat a thi

Manipur-a Moreh khuaah nimin zing khan security force te leh misual tu tih hriat lohte inkapin, he inkahna thlengah hian Manipur police commando mi pakhat a thi a, hliam tuar mi pahnih an awm bawk. Inkahna hi zing dar 5 vela thleng ṭan a ni a, nimin chawhnu lam thleng khan Moreh-ah hian an la inkap zui a ni.

Thu dawn danin misualte hian Moreh-a security post hi bomb leh silai hmangin an bei a, security post beitu misualte hian RPG hmanga an kah thu leh helai duty post bula lirthei eng emaw zat a chhiat tel thu police-te chuan an sawi. Misualin an kah hlum tak, Manipur police commando-a mi hi IRB mi leh sa, state police commando, Moreh-a attach-a awm, Wangkhem Somorjit niin, Imphal West district-a mi a ni. Moreh aṭanga video pakhat darh hmuh theihah chuan misualte hian sipai phurtu truck chu silai nena tinin, Moreh an lut tur hi an nawr let a ni.

Inkahna thlen chhan hi nikuma police officer pakhat thahna avanga police-in tribal mi pahnih an man hnuah, anmahni chhuah tura mipuiin Moreh police station-a kal a, nawrh an huaihawt vang niin an sawi. Kuki pawlte hian sorkar laipui hnenah Moreh aṭanga state police la chhuak a, central thunuaia awm security force dah turin an ngen fo tawh a, police-te hian Kuki te chu an beih fo thu leh an tihduhdah ṭhin thu an sawi. Hetih lai hian Manipur police-te chuan Kuki pawlte'n an puhna hi phain, police commando-te beitu chu tlangrama awm helpawlte niin an sawi thung.

Police officer thattu BJP district hruaitu

Nikum October thlaa Moreh-a police officer, Chingtham Anand Kumar thattu nia hriat, Hemkholal Mate chu district BJP treasurer a nih thu Manipur police-te chuan an sawi. January 15, 2024, Thawhṭanni khan Hemkholal Mate leh Philip Khaikholal Khongsai te hi Manipur police commando te chuan an man a, man an nih hnu hian Moreh judicial magistrate office-ah hruai niin, police-te hian ni kua chhung an hreng zui dawn a ni.

Hemkholal Mate hi K Moulsang khaw hotu a nih bakah, Mate Tribe Union-ah finance secretary ni lai a ni bawk a, Tengnoupal district-a BJP treasurer a ni tih hriat chhuah a nih hnu hian Manipur BJP chuan emergency meeting an ko nghal a ni. State BJP vice president, N Nimbus Singh chuan Mate chu district BJP treasurer a nihna hlihsak a nih nghal thu leh, member a nihna aṭanga an ban nghal thu a tarlang. Nimbus chuan,"Kan member zawng zawngte background leh dinhmun zirna kan nei nghal dawn a, tu pawh thil sual tihna leh pawikhawihnaah inhnamhnawih hriat chhuah an awm chuan action lak nghal zel a ni ang," tiin a sawi.

CBI-in ralthuam ruk chungchangah thubuai theh lut

Central Bureau of Investigation (CBI) chuan Manipur-a tualchhung buaina chhuak kaihhnawiha police-te hnen aṭanga ralthuam ruk chungchang an chhuina kal zelah, nikum May thlaa Manipur police-te hnen aṭanga ralthuam rua puh mi panga lakah thubuai an theh lut.

CBI-te hian Assam, Guwahati-a court of chief judicial magistrate, Kamrup (Metro)-ah thubuai hi theh luh a nih thu an sawi a, ralthuam ruk kaihhnawih chhui hna hi nikum June thla khan Manipur police te chuan CBI kutah an hlan a ni. He thubuai bul ṭanna hi Manipur Police Training College's (MPTC) Pangei complex mipuiin an luh chilh aṭanga ralthuam leh silai mu eng emaw zat an ruk chhuah aṭangin a ni.