Assam : CM-in mi nuai 42 chuang hnena ration card semna tur tlangzarh

Assam chief minister Himanata Biswa Sarma chuan National Food Security Act (NFSA) hnuaia hamṭhatna dawng tura thlan, ration card nuai 42 chuang pek chhuahna tur hun hmangin ration card sem chhuah tur a tlangzarh nghal.

He hun hi Guwahati-a Boripara hmunah hman niin, CM Sarma chuan a sorkar hnuaia mel lung pawimawh tak a nih thu a sawi. Report-a tarlan a nih danin NFSA hnuaia an state aṭanga hamṭhatna dawng thei tur zingah hian mi 42,85,745 an awm thu leh, ration card pek chhuah hna hi Assam hmun hrang hrangah uluk taka kalpui tum a ni.

CM Sarma hian an ration card sem tur neitu chhungkaw tinte chuan thla tin a thlawna buhfai kg. 5 chin an dawn theih thu a tarlang a, hei hian huam chin bik thla a neih loh thu a sawi tel bawk.

Sarma chuan mi tam zawkin hamṭhatna hi an dawn theihna atan ration card nei thei chin, kum khatah Rs. nuai 2 chin la lut tia bithliah siam chu Rs. nuai 4-ah tihsan a ni thu a sawi. 'Ration card neite hian Pradhan Mantri Ujjwala Yojana, Ayushman Bharat leh Ayushman Asom healthcare scheme aṭangin hamṭhatna an dawng thei dawn bawk a ni," a ti.