AP : Sorkarin anganwadi-a thawkte hlawh punna tur pawm

Arunachal Pradesh sorkar chuan thingtlanga chengte dinhmun siam ṭhatna an ngaihpawimawhna lantir nan, cabinet meeting an neih mekah anganwadi-a thawkte hlawh tihpunna tur an pawm thu a puang.

Hlawh tihpunna hi hman nghal tur a ni a, anganwadi-a thawk zingah pawl 10 pass-na certificate neite chuan Rs. 7,500 an hlawh tawh dawn a, pawl 10 pass-na certificate nei ve lote erawh chuan Rs. 7,438 an hlawh tawh thung ang. Hetiang bawk hian anganwadi-a helper-te hlawh pawh tihpun tur a ni a, Rs. 5,250 a ni tawh dawn bawk a ni.

Arunachal Pradesh chief minister, Pema Khandu chuan an thutlukna siamah a lungawi thu leh lawmawm a tih thu a sawi a,"Anganwadi-a thawkte hlawh tihpunna tur ruahmanna kan siam hi sorkarin an hnathawh ropui kan tihzia leh kan ngaihpawimawhzia lantirna a ni. Hei hian anmahni pawh Arunachal Pradesh tana hna ṭha zawk thawk tura a nawr kal ngei ka beisei," tiin, hlawh tihpun chuan anganwadi-a thawktu mi 6225 leh helper anga thawk mi 6225 te a huam tur thu a sawi.