Manipur : Thoubal-ah mipuiin police headquarters an bei

Moreh-a buaina chuan Manipur hmun dang kang kaiin, Nilaini zan khan Thoubal district-ah mipui thinrimin police headquarters an bei a, silai hmeh puah niin Border Security Force (BSF) mi leh sa pathumin hliam an tuar.

Police-te sawi danin mipui thinrimin police headquarters hi rawn beiin mipui zing aṭang hian tute'n emaw silai an hmet puak niin an sawi. Mipuite hian a tirah chuan Khangabok-a Indian Reserve 3rd battalion te hi an bei phawt niin an sawi a, mahse, 3rd battalion-te hian an nawr let thei a ni. Hemi hnu hian Thoubal-a police headquarters hi bei lehin, police-te hian tharum nen an nawr let a ngaih phah hial niin an sawi bawk. BSF mi leh sa hliam te hi; constable Gourav Kumar, ASI Sobram Singh leh ASI Ramji te niin, private hospital-ah enkawl tura dah an ni tawh a ni.

Buaina chhuak vangin Thoubal-ah hian curfew puan a ni a, hetih lai hian media, health lam leh court-a thawkte chu curfew hian a huam lo thung. Curfew hian airport kal turte pawh a huam lo niin tarlan a ni bawk.

Moreh-ah central force tirh luh belh dawn

Manipur governor, Anusuiya Uikey chuan Moreh-a buaina chhuah hnua boruak muanawm a la awm theih loh avangin central force tirh luh belh an nih tur thu a sawi.

Anusuiya Uikey hian Nilaini khan Imphal-a hmeichhe sumdawngte nen meeting neiin, meeting neihnaah hian Moreh-a central force tirh luh belh an nih thuai tur thu hi a sawi a ni. Hmeichhe sumdawngte hian Governor an hmuh hma hian nawrh huaihawtin, Moreh-a security force mi leh sa pahnih thah an nih avanga hma la turin an nawr a ni.

Moreh-ah hian Nilaini zing kar aṭang khan inkahna thlengin, police te leh misual tu tih hriat lohte an inkap a, he inkahnaah hian police mi leh sa pahnih an thih bakah mi pahnihin hliam an tuar a ni. Moreh-a buaina kaihhnawihah hian Manipur Commissioner of Home ,T. Ranjit Singh chuan Union Ministry of Hime Affairs hnenah lehkha an theh luh thu sawiin, lehkhaah hian sorkar laipui aṭanga Moreh buaina avanga thil thleng hrang hrang atana mamawh phuhruk nan helicopter hmantir tura an dil thu a tarlang.