Nagaland : NSF-in FMR tihtawp tur ngaihtuah ṭha turin sorkar laipui ngen

Naga Students Federation (NSF) chuan sorkar laipuiin tun hnaia India leh Myanmar inrinaa Free Movement Regime (FMR) tihtawp a tum chu ngaihtuah ṭha leh turin an ngen.

NSF hian sorkar laipui chu a thutlukna siam tawh ngaihtuah nawn leh tura an ngen rual hian Naga hnamte nen inbiakna mumal tak nei a, an hnam history leh nihna te zahsaka, thutlukna awmze nei zawk siam leh turin an ngen bawk. "Kan history hnualsuat a, Naga mipuite chanvo chhuhsakna tura hetianga hmalakna awm hian Northeast pumah dodalna nasa zawk a thlen a hlauhawm a ni" tiin, ramri hungna tura ruahmanna siam chu Naga mipuite zah lohna leh, Naga mipuite rilrua a chhe zawnga nghawng a neih nasat turzia an sawi.

"Chindwin lui leh Burma lama awm, Saramati tlang dung inkara ram leh tlangte hi Naga hnam nunphung atana pawimawh em em an ni a, India hian he history hi a pawm a, a ngaihhlutsak a ṭul a ni" tiin an atarlang. FMR titawp tura sorkar laipui hmalakna chu an dodal thu leh, FMR chuan India leh Myanmar lama cheng mihringte tan inzawmna ṭha a siamsak thu an sawi bawk.