Manipur : Bishnupur-ah mi pali thah an ni, curfew puang

Manipur tualchhung buaina chuan nghawng la nei chhunzawm zelin, Ningani khan Bishnupur district-a Ningthoukhong Kha Khunou-ah misual tu tih hriat loh, ralthuam nena che te'n mi pali an that niin Manipur police-te chuan an sawi.

Manipur police-te chuan misualin an thah takte hi; Thiyam Somen Singh (50), Ningthoujam Nabadip Meitei (38), Oinam Bamoljao Singh (63) leh a fapa, Oinam Manitomba Singh (32) te niin an sawi a, an vai hian Ningthoukhong Kha Khunou khaw mi niin, thah an nih lai hian huanah hna an thawk a ni. An ruang hi Regional Institute of Medical Sciences (RIMS)-ah post mortem turin dah a ni. Police-te sawi danin thil thlen hun lai hi Ningani tlai dar 4:40 vel a ni.

Ningthoukhong khaw mipuite chuan an khaw mite thattu hi man chhuah an nih hma chuan an ruang hi lak an tum loh thu an sawi. Buaina nasa zawk chhuak tur ven nan district thuneitute chuan Bishnupur district-ah hian curfew an puang nghal bawk.

Hetih lai vek hian Imphal West district-a Meitei khua; Kangchup Chingkhong-a Kangchup hmunah khaw veng tura inpe, volunteer pakhat chu thah a ni a, mi pakhat dangin hliam a tuar bawk. Police-te chuan he thil hi January 17 leh 18 zana helpawlin an beihnaa thleng niin an sawi. Helpawlin an beihna avanga nunna chan ta hi Takhellambam Maniranjan (26) a ni a, hliam tuar hi Mangshatabam Wanglen a ni.