AP-in Civil Aviation Award a dawng

Arunachal Pradesh chuan civil aviation lama an chet ṭhat avangin award ngaihhlut, Wings India Awards ṭum lina buatsaihah Most Proactive State under RCS-UDAN-Priority Areas award an dawng. Award hi Ningani khan Hyderabad-a Hotel Taj Krishna-a sem a ni.

Union civil aviation minister Jyotiraditya M. Scindia chuan Arunachal Pradesh sorkar hnenah award hi a hlan a ni. He chawimawina hian Arunachal Pradesh chu civil aviation-ah a ṭhang nasa tih a entir a, hmalakna pawimawh tak tak an neihte entir bawkin, heng hmalakna te hi Itanagar leh Tezu-a airport din leh hmun kilkhawr deuh; Walong, Ziro, Mechuka, Tuting leh Daporijo-a civil terminal building an siam vang a ni bawk. Arunachal Pradesh hian an state chhunga Pasighat, Ziro, Tezu, leh Itanagar kalpawhna turin fixed-wing flights te an nei bawk.

Award hlannaah hian civil aviation ministry official-te bakah minister of state for civil aviation General (Retd) V. K. Singh te an tel a, Arunchal Pradesh sorkar aiawh hian state civil aviation Director, Starlie Jamoh leh Assistant director, Priyam Borthakhur te chuan award hi an dawng a ni. RCS (Regional Connectivity Scheme)-UDAN hmalakna hlawhtling taka kalpui a nihna hian Arunachal Pradesh-a thlawhtheihna hmangtute tan hmasawnna nasa tak a thlen a ni.