Tripura : CBI camp office pali din dawn

Tripura-a venhimna hna tihchak nan leh ruihhlo kaihhnawiha suahsualna kawng hrang hrang thleng ṭhin tihtlem nana state sorkarin ruahmanna thar a siam chu tlangzarhin, he ruahmannaah hian state chhungah Central Bureau of Investigation (CBI) camp office pali din belh a nih tur thu an sawi.

Tripura chief minister Dr. Manik Saha chuan he thu hi AD Nagar, Agartala-a Manoranjan Debbarma Smriti Stadium-a Police week parade a hmanpuinaah a sawi a, Tripura police-te chu state tana boruak ṭha tak siam tura an inpekna avanga a fak thu a sawi bawk.

Chief Minister chuan Tripura-a crime rate tlahniam zel chu sawi langin, an police-te thawh rah an seng a nih thu a tarlang a, sorkar pawhin dan leh hrai kenkawh kawngah 100%-a kalpui an tum thu a sawi. Hmeichhe laka hleihlenna kaihhnawih sual te, ruihhlo dona kawng leh ram inchuh avanga pawikhawihna te a tlem zel thu sawiin, police station pawh 81 aṭanga 101-a a pun chhoh tawh thute a sawi bawk a ni.

He hunah hian CM Saha hian CBI camp office chu North Tripura, West Tripura, Khowai leh Dhalai district-ah te din tum a nih thu sawiin, Central Detective Training Institute (CDTI) te awmna atana ram pek tur ruahmanna pawh a tarlang tel bawk.