Covid-19 Hmarchhak state dinhmun

Manipur-ah Ningani zan khan Covid-19 kai mi pathum  hmuh chhuah belh an ni a, anni nen hian an state-a hri kai hmuh tawh zat hi mi 58 an tling tawh. 

Hri kai zinga mi panga chu enkawl dam ni tawhin damdawiin aṭanga chhuah tir an ni tawh a, enkawl mek mi 53 an la lawm. 

Churanchandpur district chu hri kai tamna ber niin mi 20 an awm a, heng zinga 19 chu Chennai aṭanga haw niin, pakhat hi Guwahati aṭanga haw a ni bawk. Hri kai zinga 25 hi RIMS ah enkawl niin, mi dang 28 chu JNIMS ah enkawl mek an ni. Hri darh zel tur venna atan hri kai hmuh belh tharte nena inhnaihvaina lo neite pawh zawn chhuah mek an ni thu sorkar thuchhuak chuan a tarlang. 

State chhungah hri kai an awm belh zel avangin chief minister N Biren Singh chuan Ningani khan state health official, health mission leh UNACCO school official-te chu Imphal West-ah meeting a neihpui. Meeting-ah  hian UNACCO School, Meitram-ah khum 100 awmna, temporary Covid-19 Care Centre siam an rel a ni. 

April 19 khan Manipur hi Covid-19 kai awm lohna state-ah puan a lo ni tawh a, mahse hemi hnu hian lockdown avanga hmun dang tangkhangte an haw khawm hnuah hri kai hi hmuh chhuah thar an ni leh a, an la pung chho zel a ni. 

Nagaland-ah nimin zing khan hri kai mi pasarih hmuh chhuah belh an ni leh a, hri kai hmuh tawh zat hi mi 25 an tling tawh a ni. 

Nimina hri kai hmuhte hi May 22-a Sharmik special train hmanga Chennai aṭanga haw te vek an ni a, an zinga panga chu Kohima-a mi niin, Dimapur leh Tuensang-a mi pakhat ve ve an tel bawk. 

Nimin khan Meghalaya-ah hri kai thar mi paruk hmuh chhuah belh an ni a, Ningani zan khan mi dang pakhatin hri hi a kai tih  hmuh a lo ni tawh bawk. An state-a hri kai hmuh hi mi 27 an tling tawh a ni. 

Hri kai hmuh chhuah tharte hi Haryana, Maharashtra, Bangalore, West Bengal leh Chennai aṭanga haw vek an nih thu chief minister Conrad Sangma chuan a sawi a, an vai hian an taksaa natna langchhuak lo asymptomic vek an ni tih a sawi bawk. Hri kai hmuh tharte hi quarantine center-ah an awm mek a ni. 

Assam-ah pawh hri kai an pung chak hle. Nitin mi eng emaw zatin hri an kai tih hmuh chhuah belh zel a ni a, nimin thleng khan hri kai hmuh tawh hi mi 935 an tling. 

Hri kai an pun chak avangin dam lo te enkawlna turin state sorkar chuan cheng vaibelchhe 150 sengin Gauhati Medical College and Hospital (GMCH)-a superspeciality block-ah Covid-19 facility a siam thar a, hei hi Ningani khan health minister Himanta Biswa Sarma chuan a hawng a ni. 

GMCH-a Covid-19 facility siamna hi sokar laipuiin a tumsak a ni a, khum 236 awmin, ICU-ah khum 50 a awm bawk. Minister chuan hri leng a reh hunah he hmun hi superspeciality hospital atan hman chhunzawm leh a ni ang, a ti.

Ningani khan Tripura-ah Covid-19 kai pahnih hmuh chhuah belh leh an ni a, hri kai hmuh tawh hi mi 244 an awm tawh. 

Cheif minister Biplab Kumar Deb chuan Ningani khan sample 1,050 test a ni a, heng zinga pahnih chu a positive tih a sawi. Hri kai hmuh tharte hi Maha­rashtra state aṭanga haw an nih thu a sawi bawk. 

Tripura-ah hian tun hnaia hri kai hmuh chhuah belh zinga a tam ber chu state dang - Maharashtra, Karnataka, Tamil Nadu, West Bengal leh hmun dang aṭanga haw an ni. Hei vang hian  hmun dang aṭang hawte hi sample test neihpui zel niin, mi 20,871 test an ni tawh tih official-te chuan an sawi. 

Tangkhang hawte khung hranna hmun 300 siamah mi 10,594 an awm mek a, mi dang 10,294 chu an inah khung hrang an ni bawk.