Arunachal Pradesh-ah Bharat Jodo Nyay Yatra a thleng

Rahul Gandhi kaihhruai Congress-in Lok Sabha inthlan buatsaihna pakhat atana India ram fang tura an hmalakna chuan Inrinni khan Arunachal Pradesh an lut.

Rahul Gandhi hi Arunachal Pradesh Congress Committee (APCC) president, Nabam Tuki chuan Papum Pare district-a Gumto check gate-ah a lo hmuak a ni.

Gandhi hian Arunachal Pradesh khawpui, Itanagar-ah Inrinni khan press conference a nei a, nimin khan Itanagar hi a chhuahsan leh nghal a ni. Yatra-in Arunachal Pradesh a luh hian flag inhlan chhawnna hun hman a ni a, Gandhi chuan thu sawiin, amah an lo hmuah avangin mipuite chu lawmthu a hrilh. Nyishi traditional headgear khumin Gandhi hian Doimukh a pan chhunzawm a, heta ṭang hian Naharlagun-ah bus-in a kal leh a ni. Naharlagun-ah hian khawlaia thil zuarte nen inkawmna hun an hmang ang a, chumi zawhah Nyokam Lapang-ah kea kal lehin, Malo Tarin-a sikul tualzawlah thusawina hun a hmang leh ang.

Arunachal Pradesh-a a awm chhung hian venhimna khauh tak pek a ni a, Papum Pare SP, Taru Gusar chuan Itanagar a panna tur kawngte chu uluk taka endik lawk vek a ni, a ti. Itanagar SP, Rohit Rajbir Singh pawhin Itanagar hmun hnihah venhim hna thawk tur an indah belh thu a sawi bawk.

Rahul Gandhi hian nimin khan Arunachal Pradesh hi a chhuahsan leh nghal a, km 6,713 zet a kalna tur Bharat Jodo Nyay Yatra hi March 20-ah, Mumbai-ah tihtawp a tum a ni.