Manipur: State pum huap bandh huaihawt

Manipur Joint Action Committee (JAC) te chuan Inrinni zing dar 5 aṭang khan Thiyam Konjil Samajing Leikai khuaa volunteer pakhat, Manoranjan Singh thah a nih avangin state pum huap darkar 48 chhung bandh an huaihawt.

JAC hian state sorkar hnenah memorandum theh lutin, memorandum-a an ngen anga state sorkar hnen aṭanga chhanna an dawn loh avanga bandh hi huaihawt an nih thu an tarlang. JAC hian an memorandum theh luhah hian Manoranjan Singh thattu hi darkar 24 chhung ngeia man an duh thu sorkar hnenah hian an hriattir a ni.

Bandh huaihawt a nih avang hian inter-state leh inter-district kawngpui velah lirthei tlan hmuh tur a awm meuh lo a, sumdawnna hmun leh bazar te pawh khar vek niin, sumdawng lirtheite pawhin bandh hi zawmin an service lo a ni. He thu buatsaih lai thleng hian bandh kaihhnawihah pawikhawihna lian tham thleng hriat a la ni lo.

Sipaite'n bunker pahnih tichhia, ralthuam thuhruk man

Assam rifles leh Manipur police-te chuan Inrinni khan Kangpokpi district-a Leimakhong-ah khaw mite'n bunker pahnih an siam tichhiain, ralthuam dah ṭhat eng emaw zat an man. Assam Rifles leh Manipur police-te hian joint operation neiin tualchher pistol 9mm pahnih, pompi gun, revolver, LMG mu ṭhahnem tak bakah AK mu te, hand granade pathum, bomb tihpuahna pahnih leh mortar bakah ralthuam dang eng emaw zat an man tel a ni.

Leimakhong bakah hian Manipur hmun dangah pawh sipaite'n beihpui thlakin, Tengnoupal district-ah ralthuam ṭhahnem tak an man bawk. Chimkim khua leh Moreh ward IX-a beihpuithlaka sipai kalte erawh khaw mi hmeichhiate'n kawngpuia thing leh motor ke halin an lo dang thung.

SOREPA-in Republic Day boycott dawn

Manipur-a helpawl pakhat Kangleipak-a Socialist Revolutionary Party (SOREPA) te chuan January 26-a India-in Republic Day a hman tur boycott an tum thu sawiin, hemi ni hian zing dar 4 aṭanga tlai dar 5 thleng shutdown an puan tur thu an sawi.

SOREPA publicity leh organization secretary, MC Yaiphabi chuan SOREPA-in Western South East Asia (WESEA) leh Kashmir region-a nawrh, lungawi lohna lantir, boycott, shutdown leh thil dangte pawh eng pawl pawhin an huaihawt chuan an thlawp thu sawiin, mipuite chuan India sorkarin hnam hrang hrang inkara inhuathna an tuh mek dan chu an hmuh thiam a ṭul tawh thu an sawi. WESEA hnuaia pawl hrang hrang intel khawmna tur kawng an duan dante an tarlang bawk. Shutdown neih a nih chhung hian media mite, medical service leh sakhuana thila pawimawh ti turte chu dan tel an nih loh tur thu SOREPA hian an tarlang bawk.