Relief camp-a awmte tan in leh hna thawh tur ngaipawimawh dawn

Manipur Governor Anusuiya Uikey chuan Plenary of The North Eastern Council vawi 71-naa a thusawiah, tualchhung buaina chhuak tuartu relief camp-a awm mekte chu an chenna hmuna an kir leh thuai chu a duhdan a nih thu leh buaina avanga in leh lo chante chu chhawmdawlna pek an ngaih thu a sawi.

Governor Anusuiya Uikey chuan relief camp-a awm mekte chu hnathawh tur ngaihtuahsak leh chenna in pek chu ngaihpawimawh hmasak a ngaih thu a sawi bawk. An state chhunga kawngpui pawimawh (Highway) te chu insum-dawn tawnna a chak lehzual theih nan thawm ṭhat a ngai tih sawiin, thingpui huan tihhmasawn chuan an state chhunga Opium chingtute tan hna dang siamsak kawngah a thawhhlawk a rin thu a sawi bawk a ni.

Uikey chuan Manipur chu infiamna (Sports) lama an thawhhlawk thu leh infiamna hmunhma tihchangtlun a ngaih thu a sawi a, Manipur chu hmun nuam tak a nih avangin khualzin hip kawngah theihna sang tak an neih thu a sawi bawk a ni. Central hotute kaihhruainain Manipur chuan remna leh hmasawnna kawng a zawh leh vat a beisei thu a sawi.