Assam State election Candidate zinga 21% mi hausa tawntaw

Assam state assembly election thawh khatna chu April 4 hian neih a ni tawh dawn a, April 11-ah inthlan thawh hnihna neih a ni ang.

Assam hi tun dinhmunah chuan India rama state hausa zingah chhiar tel a ni lo a, mahse inthlan a hmachhawn turah hian candidate zingah hian mi hausa tawntaw 112 zet an awm. Hei hi candidate zawng zawng 539 aṭanga 21% lai a tling phak. Inthlan thawh khatna a candidate zingah hian mihausa tawntaw 56 chuan mipui vote an beisei dawn a, an zingah hian Mani Kumar Subba-a nupui Jyoti Subba pawh a tel dawn a, candidate zinga hausa ber a ni nghe nghe.

Candidate 593 zingah hian candidate 20 chuang te hausakna chu cheng vaibelchhe 20 chuang a ni a, hei hi candidate zinga 4% a tling phak bawk. Candidate 46 (9 %) thil neih hlut zawng chu vaivelchhe 2 - 5 vel nia chhut a nih bakah candidate hausa zual 119 (22 %) te in leh lo hlut zawng chu nuai 50 aṭanga vaibelchhe 2 vel nia chhut a ni bawk. Candidate 230 te thil neih hlut zawng chu nuai 10 vel nia ngaih a ni bawk. Candidate te hausakna leh an thil hlu neih te hi Assam Election Watch leh Association for Democratic Reforms (ADR) te chuan chhutin, Ningani khan mipui hriatah puanzar a ni.

Candidate zinga hausa ber, Sootea bial-a Independent a ding tur Jyoti Subba hausakna leh a thil neih hlut zawng chu cheng vaibelchhe 288 niin report chuan a tarlang. A thil neih zinga laksawn theih hlut zawng chu vaibelchhe 141 a ni a, laksawn theih loh vaibelchhe 146 hu a nei a, a thil neih dang hlut zawng chu vaibelchhe 121 vel ni turah ngaih a ni bawk. Ani bakah hian AGP candidate Naren Sonowal, Naharkatiya LAC-a ding tur chu hausa ber dawttu a ni a, a hausakna hi cheng vaibelchhe 33 vel a ni. Pathumna-ah hian Congress candidate a ni ve thung a, Algapur LAC-a ding tur Rahul Roy niin, State Minister hlaui Gautam Roy fapa a ni. Rahul Roy-a hausakna hlut zawng hi vaibelchhe 25 hu a ni.

Candidate hausa zual zingah hian Congress candidate an tam ber a, an party candidate 65 zinga 36 te chu mihausa tawntaw an ni a 55% a tling phak, BJP candidate 54 zinga 23 te chu hausa zingah hian an tel a, chu chu 43 % a ni. Anni bakah hian Asom Gana Parishad candiate zinga 7 (64 %) , NCP candidate 9 zinga 2 (22%), Bodoland People’s Front candidate 3 zinga 2 (67 %) leh Independent candidate 280 zinga 26 (9%) te an ni. Inthlan thawh khatna-a ding tur candidate te hausakna chawhrual chu cheng vaibelchhe 1.47 a ni tih tarlan a ni bawk.

Party lian zingah Congress MLA 65 te thil neih hlut zawng chawhrual chu vaibelchhe 2.62 a ni a, hetih lai hian candidate 54 neitu BJP party candidate-te thil neih hlut zawng chawhrual erawh vaibelchhe 1.50 a ni. Candidate 27 nei, AIUDF candidate te thil neih hlut zawng chawhrual chu vaibelchhe 1.06 a ni a, Candidate 13 neitu SUCI(C) candidate te thil neih hlu zawng chu chawhrualin nuai 10.35 a ni, anni bakah hian Asom Gana Parishad nuai 6.06, CPI(M) nuai 35.78, CPI nuai 16.05 leh Independent candidate 280-te thil neih hlut zawng chawhrual chu vaibelchhe 1.48 a ni bawk. Teok constituency-a ding tur CPI(ML) candidate Jiten Tanti leh Independent candidate Diganta Phukan, Mariani constituency-a ding tur te chuan zero assets an nei niin affidavit aṭangin a lang.

Candidates zinga income nei tlem ber chu Patharkandi Constituency-a ding tur Debangshu Nath SUCI(C) a ni a, Rs 2,362 a nei. Jan Congress Party hminga Duliajan LAC-a chuh tur, Anjali Senapati chuan Rs 2,250 neiin Ratabari Reserved Constituency-a SUCI(C) candidate Satyendra Namasudra chuan Rs 4,630 a nei.

AGP party candidate Jayanta Khaund thil neih hlut zawng chu vaibelchhe 21 niin tarlan a ni a, nimahse leiba vaibelchhe 13 a nei. A ni ang bawk hian Jonai (ST) LAC-a ding tur Independent candidate Satho Basumatary hausakna chu vaibelchhe 12 ni mah se leiba vaibelchhe 5 a nei a ni. Candidate 68 (13%) te chuan Permanent account number (PAN) kim chang an pe lut lo nia tarlan a ni bawk.