ADB sumin Meghalaya-a school te tichangtlun dawn

Meghalaya state-a Government-aided private school 100 te chu Asian Development Bank (ADB) project hnuaiah national standard-ah upgrade a ni dawn.

School tih changtlunna tur project hian zirlai rethei zual bik 20,000 tan kawng a hawnsak dawn a, heng zinga 40% chu hmeichhia an ni a, zirtirtu 3,500 tan training a buatsaih sak dawn bawk.

Chief Minister Mukul Sangma chuan Thawhṭanni khan Pomlum Higher Secondary School sakna tur lungphum a phum. Sangma chuan thu sawiin, ADB sum hmanga project kalpui tur chu Meghalaya Human Capital Development chuan a thlawp thu a ni a ti a, Meghalaya chu ADB-in secondary education leh skill development a kalpuina hmasa ber a ni thu a sawi bawk. .

Project kalpui nan hian US dollar maktaduai 100 chu ADB chuan a tum dawn a, state sorkar chuan US dollar maktaduai 25 a tum ve dawn a ni. Hei bakah hian Japan Fund for Poverty Reduction for capacity building of civil society organisation chuan US dollar maktaduai hnih a tum ve bawk ang.

Project hi kum nga chhung kalpui a ni dawn a, hna ṭan thuai a ni ang. CM chuan hmasawnna ropui tak a nih thu a sawi a, education leh skill development-a state hmasawnna tur ropui tak a ni dawn a ni, a ti.