NEHU zirlaiten HASA duh lo

North Eastern Hill University Students’ Union (NEHUSU) chuan zirtirtute tana Hill Areas Special Allowance (HASA) kalpui chu an duh loh tih an sawi. Staff te hnena HASA pekna tur hian infrastructure tichangtlunna tur sum tam tak a pawt peng dawn niin an sawi.

NEHUSU adviser Pynkmenlang Sanmiet chuan Ningani khan press conference a ko a, media te hmaah thu sawiin, HASA chu kum 1995 daih khan kalpui a ni tawh a, chu chuan University infrastructure lama hmasawnna nasa takin a nghawng a ni, a ti. India President chuan kum 1995-a NEHU a tlawh tumin HASA hi a lo pawmpui tawh a ni, a ti.

HASA hi staff te hnena an basic pay aṭanga 12% an pek belh hi a ni. NEHUSU lam chuan HASA hi kum 2009 khan sorkar laipui chuan a sut tawh a, mahse NEHU-ah hian kalpui zel a la ni, an ti. HASA hian Univesity infrastructure tihchangtlunna tur sum tam tak a pawtpeng tih an sawi a, kum 2013-14 chhung khan cheng vaibelchhe 2 chuang HASA atan hian a pawtpeng niin an tarlang. Hei bakah hian Hostel tihchangtlunna tur a ei hek tel niin an sawi bawk.