ASSAM :Nagaon-ah Rahul Gandhi an dang

Bharat Jodo Nyay Yatra neia India state hrang hrang fang tura kal mek, Rahul Gandhi chu nimin khan Assam-a social reformer Saint Srimanta Sankardeva pianna hmun, Batadrava Than tlawh phalsak loin, Nagaon-ah dan a ni tih Congress chuan an sawi.

Rahul Gandhi hian Nagaon district-a Bordowa Satra tlawh turin ruahmanna a siam a, phalna nei vek siin luh phalsak a ni lo tih an sawi. Luh phalsak a nih loh hnu hian Gandhi leh amah zuitute hian Nagaon-ah hian nawrh an huaihawt chhunzawm nghal a ni.

Congress general secretary, Jairam Ramesh chuan,"Rahul Gandhi hian helai hmun tlawh hi a tum reng tawh a, January 11 aṭang khan tum tawhin, thuneitute be tur pawhin kan MLA pahnih kan tir a ni. January 22 zing dar 7-a kan kal tur thu sawiin, phalsak kan nih thu pawh min lo hrilh. Hetih lai hian Pathianni khan, Thawhṭanni tlai dar 3 hmaa kan kal theih loh tur thu min rawn hrilh leh ta a ni," tiin a sawi.

Batadrava Than thuneitute hnen aṭanga MLA, Sibamoni Borah lehkha dawnah Rahul Gandhi chu January 22-ah hian tlai dar 3 hma chu helai hmun a luh phal a ni lo tiin an tarlang a, Ram temple hawn leh a chhehvel thil avangin helai hmuna hun hman dan tur chu a inhnawh nasa deuh niin an sawi. Assam Congress MP Pradyot Bordoloi chuan Batadrava Than thuneitute chu BJP nawrna avanga hetianga hma la an nih thu a sawi a ni.

Bordowa hi kum zabi 15 leh 16 hun laia Assam khawtlang nun siam ṭhat nana thawhhlawk tak, Srimanta Sankadev pianna hmun a ni a, Congress hian January 22-ah Yatra neih a nih laiin Rahul Gandhi-a'n helai hmun a tlawh tur thu hi an lo puang tawh a ni.

BJP-te'n Gandhi dodalna nawrh huaihawt

Assam-a BJP worker-te chuan Pathianni khan Congress hruaitu, Rahul Gandhi leh Bharat Jodo Nyay Yatra a neih mek dodalna lantir nan, Gandhi-a chawlh lailawkna, Rupohihat-a restaurant kawtah nawrh an huaihawt. Nawrh huaihawtnaa kal khawmte hian Rahul Gandhi duh lohna leh Bharat Jodo Nyay Yatra duh lohna thuziakte kengin an au rual bawk.

Nawrh huaihawtna hmunah hian buaina chhuak tur veng turin sipai tirh nghal an ni. Report chuan Congress hruaitu Jairam Ramesh chuanna lirthei chu pung khawmte hian an bei a, Assam Congress president, Bhupen Borah chu kut an thlak bawk niin an tarlang. Bhupen Borah hian hliam tenau a nei a ni. Nawrh huaihawtte'n Congress hruaitute an beihna hmun hi Sonitpur district-a Jamugurihat area niin an sawi.