Manipur : CM-in central force-te puihna a dil thu a sawi

Manipur chief minister N Biren Singh chu Kuki helpawl ni ngeia hriatte'n Ningthoukhong Kha Khunou, Ward No 4-a helai khaw mi pali an thah avangin Pathianni khan mitthi chhungte tlawhin Ningthoukhong Kha Khunou-ah a kal. Chief Minister chuan tual thahna chu a dem thu sawiin, Manipur mipuite venhim an nih theih nan leh remna a awm thuai theih nan central force puihna a dil tawh thu a sawi. Helpawlin an thah tak chhungte dinhmun chu enin an lainatawm thu a sawi a, hetianga Meitei khuaa Kuki helpawl chetvelna thlithlai a, bei let tur hian sorkar pawhin hma a lak thu a sawi. Tualthattute chu man ngei an nih tur thu leh, dan anga hremna an hmuh ngei tur thu a sawi bakah, mitthi chhungte tan zangnadawmna a pe bawk a ni.

CM Biren Singh hian Pathianni vek khan Imphal-a 1st Manipur Rifles battalion parade ground-a Statehood Day vawi 52-na hmanpuiin, central force-te'n Manipur buaina chungchanga an hnathawh dan chu a duhkhawp loh thu a sawi. Central force te hian buaina thlithlai bakah mipui himna leh an thil neihte venhimsak chu an hna a ni. Buaina tihreh dan zawnga hnathawk tur an nih laiin, buaina chu an thlir liam tawp mai a ni," tiin a sawi. Manipur mipuite chu India mi an nih vek thu leh, India mite nunna venhim chu central force te tihtur zinga a tel thu a sawi bawk.

Singh hian tualthahna thlenna hmunte tlawhin, he tualthahna avanga Joint Action Commitee (JAC) bul tuma nawrh huaihawt mek, Meira Paibi leh JAC te a kawm bawk a ni.