Meghalaya-in health worker-te vaccine pe hmasa dawn

Meghalaya sorkar chuan Covid-19 vaccine a awm hunah vaccine hi state chhunga health worker 25,000 te hnenah pek hmasak a tum. 

State director of health services, Aman War chuan khawvela vaccine enchhin mek zingah a thawh thumna paltlang tawh vaccine pali a awm tawh tih sawiin, nakkum kumtir lamah chuan vaccine hi hman theih a ni tawh ngei dawn a ni, a ti. Vaccine hi semchhuah a nih theih velah an state-a hripui dona kawnga hma tawngtu, health worker-te chu Covid-19 vaccine hi pek hmasak an ni dawn tih a sawi. War chuan health worker zawng zawngte chuan insurance cover, Rs nuai 50 an nei vek tih a sawi bawk. 

War chuan vaccine man tur chungchang hi sawiho a la ni lo a, a awm hunah thutlukna hi sorkarin a la siam ang, a ti. Vaccine hi state mipuite hnenah Meghalaya Health Insurance Scheme hnuaiah a thlawna sem a ni dawn em tih pawh ngaihtuah a ni dawn a ni, a ti. 

Mipui nawlpui zingah Covid-19 vaccine te chu a him tawk loh hlauhthawnna a awm tih War chuan a sawi a, "An hlauthawng pawh hi thil awm tak a ni. Mahse vaccine semchhuah tura pawm tawh chu a him tawk dawn tih an hriat kan duh a ni," a ti. Hemi rual hian vaccine lak leh lak loh chungchangah mipuite duhthlanna a nih tur thu leh, a duh loh chuan an lo hnial theih thu a sawi bawk.