Vawiin-ah Assam inthlan thawh khatna

Assam state assemly election thawh thawh khatna chu vawiin hian assembly bial 126 zinga bial 65-ah neih a ni dawn. Inthlan thawh hnihna chu April 11-ah neih leh a ni ang.

Inthlan thawh khatna neihna tur bialah hian vote nei mi 95,11,732 awmin an zinga mi 45,95,712 chu hmeichhia an ni. Vote thlakna tur polling station 12,190 siam a ni bawk.

Vote thlakna tur bialte hi Upper Assam, hill district, northern bank leh Barak Valley a ni a, boruak muanawm tak hnuaia vote thlak a nih theih nann venhim hna thawk turin security force 40,000 chuang duty tir an ni. Inthlan buaipui tura ruat mi 48,000 te chuan kar kalta Zirtawpni khan an duty-na tur lam an pan fel tawh bawk.

Inthlan thawh khatnaah hian Congress party chuan bial 65-ah a chuh vek dawn a, BJP chuan bial 54-ah chuhin a thawhpui AGP-in biak 11 leh BPF in bial thumah an chuh bawk ang. AIUDF in bial 27, CPI leh CPI(M) in bial 10 ve ve leh CPI(ML) in bial parukah an chuh dawn a, party tenau dang 60 ten candidate an neih bakah independent candidate 13 an awm bawk.

Candidate 539 zingah mipa 496 leh hmeichhia 43 an awm a, inthlan neihna tur bial hi Brahmaputra Valley-a constituency 45, Karbi Anglong leh Dima Hasoa hill district-ah bial panga leh Barak Valley-abial 15 te an ni.

Assam Chief Minister Tarun Gogoi, BJP chief ministerial candidate Sarbananda Sonowal, Union minister Asom Gana Parishad, AGP president Atul Bora te chu inthlan thawh khatnaa candidate langsar zual an ni. A zawna Assam Chief minister
ṭum thum ni tawh leh tuna CM ni lai mek Tarun Gogoi chu a dinna ngai Titabor LAC-ah a ding leh dawn a, amah khing tur hian BJP chuan an party chhuanvawr MP Kamakhya Prasad Tasa an theh chhuak. Hemi te pahnih hian ngaihven a hlawh hle a, sawi hlawh ber pawh a ni.

Titabor LAC atang hian kum 2001 aṭang khan Gogoi hi hneh taka thlan tlin a lo ni tawh a, tun ṭumah pawh Titabor mipuite chuan an la thlawp ṭha viau niin an sawi a, a tlin leh ngei ring pawh an tam hle. Gogoi-a campaign manager leh Thengal-Kachari ethnic community hruaitu ni bawk Kumud Kachari chuan, Titabor mipuite chuan Gogoi-a chungah rinna an la nghat niin a sawi a, a term li nan hneh taka thlan tlin leh a nih ngei tur thu a sawi.

BJP chief ministerial candi-date Sarbanada Sonowal chu Majuli constituency-ah a ding dawn a, amah khingtu tur chu Congress MLA Rajib Lochan Pegu a ni a, minister pawh lo ni tawh ṭhin a ni. Ranjit Doley chu Majuli LAC-ah hian a ding ve dawn bawk a, ani pawh hian thawm a nei lian hle a, voter nuai 1.14 chuang a nei niin an sawi. AGP president Atul Bora chu Bokakhat LAC-ah a ding dawn a, Congress MLA Arun Phukon nen an inkhing dawn a ni.

Sorkarna chelh mek Congress party leh AGP-BJP alliance te chu Brahmaputra valley con-stituency-ah an inkhing dawn a, hetih lai hian Barak valley constituency-ah chuan Cong-ress, BJP leh Badaruddin Ajmal kaihhruai All India United Democratic Front (AIUDF) te chu inkhing tawk tur ngaih an ni.