JP Nadda-a'n Manipur zin hun sawn

Bharatiya Janata Party (BJP) national president, JP Nadda chuan Manipur-a zin a tum hun chu a sawn hla a, a zin theih hun tur a la sawichiang lo. 

BJP President hian a hmaa ruahmanna a lo siam tawh ang chuan nimin khan Manipur hi ni hnih cham tura kal a tum a ni. Hei hi ni 120 chhunga ram chhung hmun hrang hrang tlawhna tur programme a siama mi a ni. 

Nadda hian Manipur tlawh hun a sawn hlat ṭum hnihna a ni a, a hmain December 1-2 khan zin a tum a, hei pawh hi a lo ṭhulh tawh a ni. 

November 4 aṭang khan BJP President ni 120 chhunga ramchhung hmun hrang hrang tlawh chhuahna tur programme a nei ṭan a, Uttrakhand a tlawh hmasa ber a ni. State tin tlawh kual a tum a, a kalnaah hian an party tihchakna turte ngaihtuahin, a bikin BJP chet ṭhat vak lohna hmunte a ngai pawimawh zual dawn nia sawi a ni. A zinnaah hian party hruaitute leh worker-te meeting a neihpui ṭhin ang. 

Manipur BJP unit chuan JP Nadda-a'n an state a tlawh theih hun tur hi an la chiang lo tih sawiin, nakkum January thla tirah a kal theih an beisei thu an sawi.