Court-in Sharmila thiamchan tir, Nawrh kalpui zel a tum

Manipuri rights activist Irom Sharmila chu Delhi court-in thiam a chantir a, nimahsela AFSPA hlih a nih hma loh chuan chaw ngei chhunzawm zel a tum tih a sawi.

Kum 2006-a mahni intihhlum tuma puh a nih avangin Delhi Court-a inlan tura tih a ni a, tunhnai khan inlanin Court chuan thiam a chan tir. Sharmila chuan AFSPA hlih a nih hma loh chuan a awm mekna J.N. Institute of Medical Sciences security room Imphal-ah thih thlenga beih a tum thu a sawi. Sharmila hian Court thuthlukna sut a nih hma loh chuan engmah ei leh in a tum lo tih a sawi a, a hnarah eitur an pe chhunzawm a ni.

Kum 42 mi human rights activist hian kum 16 chhung chu Armed Forces (Special Powers) Act hlih a nih theih nan chaw a nghei tawh a ni. Tunhnai khan JNU zirlai te chuan Sharmila an thlawp thu hi an au chhuahpui a, Delhi Court-a a inlan hma hian zirlai eng emaw zat chuan Sharmila hi an hmu a, an thlawpna an lan tir a ni.

Sharmila hian Imphal a thlen hnu hian Prime Minister Narendra Modi-a hmuh ka duh thu a thlen chu PM hian hun a neih loh thuin a chhang niin a sawi. "Min hmuh duh loh chhan hi ka hrelo a, India ramah hian Democracy hian awmzia a nei tlem hle a, hei hian hmasawnna a dal a ni", a ti. Mipuite ngaihdan a hriat duh thu sawiin, Manipur-a hman mek AFSPA chu dodal chhunzawm zel chi a ni em tih a hre duh niin a sawi a, hemi hnu hian ama mimal chuan a hlawhtlin hma chu chhunzawm a tum thu a sawi thung.

Sorkar laipui leh state sorkar-a hruaitu tam tak chuan Shermila hi a thilphut chawlhsan turin an thlem fo tawh a, mahse a rilru thlak mai a tum loh thuin a chhang. Sharmila chuan JNU zir lai leh Manipur zirlai thahnem tak te nena Delhi court complex-a Police ten inbiak an rem tilo chu pawi a tih thu a sawi a, mihring dikna humhalh kawngah theihtawp chhuaha hma lak zel a tum thu a sawi bawk.

Judge Harvinder Singh chuan Court-in Sharmila thiam a chantir chu thil dik a ni tih sawiin, "India hnampa Mahatma Gandhi khan India mi chu midangte tana nung tur te, mahni nun inhmangaih tur tein min zirtir a ni", a ti. District and Sessions court, Imphal West pawhin Sharmila chu hian mahni intihhlum tumna a nei lo tiin thiam a lo chantir tawh bawk a ni.

Hetih lai hian Manipur Chief Minis-ter Okram Ibobi Singh chuan, AFSPA chu state pumah hlih a nih tur thu a sawi a, kum 2014 August12 khan an state chhung hmun sarih-ah ASFPA hi a lo hlip tawh bawk a ni. State sorkar thuchhuah chuan AFSPA chu hlih an rem ti niin a sawi a, sorkar laipuiah thlen a nih tur thu an sawi. Mipuiten Sharmila hi an thlawp ṭha a, sorkar pawhin a tawmpui a ni, a ti. State sorkar chuan Manipur Iron Lady en kawl nan hian thla tin Rs 80,000 a seng ral ṭhin a ni.