Kum 2017-18-ah AP power-ah into-delh hman beisei

Arunachal Pradesh Chief minister Kalikho Pul chuan kar kalta Inrinni khan an state chu kum 2017-18-ah chuan power-ah an intodelh hman tur thu a sawi.

CM Pul chuan Headquarters leh District headquarters te chuan power an duh ang an hmu thei tawh dawn niin a sawi a, administrative centre te chuan hnianghnara power hman tur an nei thei dawn a ni, a ti.

10KW pe chhuak thei, hydro-power project siam mek chu 2MW pe chhuak thei tura tihlen a ni dawn. Chief minister chuan power thar chhuah chuan central atang power an chawk luh chu tihtawp a ni ang a, chu chuan sum leh pai tam tak sen ral ṭhin chu a veng thei dawn a ni, a ti. Hydropower project chu kum hnih chhunga zawh hman tur a ni a, zawh fel a nih chuan nasa takin state sorkar chuan hma a sawn thei dawn a ni a tibawk.