Assam-ah hel pahnih thah an ni

Sipai thuchhuahin a tarlan danin Assam-a Karbi Anglong district-ah Karbi People’s Liberation Tiger (KPLT) hel pahnih thah an ni a, midang pawh man an ni.

Defence Ministry thupuang-tu, Lt. Col. Suneet Newton chuan hel pahnih te hi Zirtawpni zing khan thah an ni tih a sawi a, sipaite chuan hel lakah hian chhun zan zawmin beihpui an thlak mek niin a sawi bawk. Kalyani reserve forest-ah Zirtawpni zing khan sipaite chu an kal a, hel nen hian inkapin KPLT mi pahnihte an kahhlum bakah midang pakhat an man tih Newton chuan a sawi. Helho kut aṭang hian HK 33 Rifle pakhat leh pistol an man bawk.

Hel an kahhlumte hi Sojong Tisso leh Mokrang Bey an ni a, KPLT tana mi pawimawh tak niin an sawi, an rual hian Son Tisso chu an man a ni. Sojong Tisso zawk hi KPLT finance secretary sipai ten thah tuma an bitum mek zing a mi a ni nghe nghe. Hel pawlte hian Assam inthlan chawhbuai an tum niin an sawi a, Diphu, Bokajan, Howraghat leh Baithalangsho constituency-ah te chet an tum niin an sawi. KPLT bakah hian hel pawl ṭhenkhat chuan Assam inthlanah hian buaina chawhchhuah tumin hma an la mek bawk.