Assam-ah Covid-19 vanga thi 1,000 tling

Assam-ah Covid-19 vanga thi chu kar liam ta Inrinni khan mi 1,000 an tling.

Assam-a hripui vei hmuh chhuah tawh hi mi  2,14,432 an awm tawh a, mahse an zinga 97% chu enkawl dam ni tawhin, hmarchhak state zinga recovery rate ṭha ber dawttu a ni. Arunachal Pradesh chu recovery rate sang ber niin, hri kai enkawl dam tawh hi 97.98% an awm tawh a ni. 

State health and family welfare department-in a tarlan danin, an state-ah hripui vanga thi hmasa ber chu April 10-ah khan niin, hei hi Assam bakah hmarchhak biala Covid-19 vanga thi an awmna hmasa ber a ni. 

Health minister Himanta Biswa Sarma chuan hri kai hmuh tawh mi  2,14,432  zinga 2,09,936 chu enkawl dam an ni tawh a, hri kai mek hi 3,493 an la awm tih a sawi. 

Assam-a hri kai hmuh zinga 53,137 hi state khawpui, Guwahati-a mi an ni.