Assam : Inthlan thawh khatna nei

Assam state assembly election thawh khatna chu nimin khan neih a ni a, assembly bial 65-ah mipuiten an aiawh tur thlangin vote an thlak.

Assembly inthlan hi thawh hniha neih a ni dawn a, a thawh hnih-na chu April 11-ah neih a ni ang.

Nimina vote thlakna biak 65-ah hian candidate 539 an awm a, vote pawh a tla ṭha thawkhata ngaih a ni. Nimin tlai lam dar thum thleng khan vote tla hi 66% a tling pha.

Chief Minister Tarun Gogoi chuan a nupui, Dolly Gogoi, an fapa Gaurav Gogoi leh a unaupa Deep Gogoi te nen Debicharan Baruah Girls High School polling station-ah vote an thlak a ni.

Tarun Gogoi chuan an state-ah hian Congress sorkar a ding lh ngei dawn tih a chiang tih a sawi a, an state mipuite tan a
ṭha lama inthlak danglamna nasa tak a kaihhruai sorkar chuan a thlen a ni, a ti. An state tana an hnathawh zawng zawngte chu mipuite chuan hmuin an fiah vek a ni tih a sawi.

Gogoi hi Jorhat district-a Titabor constituency-ah a ding a, mipuite ngaihven ber pakhat a ni. Chief Minister chuan an party chauh chu Assam state tana hmasawnna thlentu leh sul suttu niin a sawi a, harsatna tam tak an paltlang thu leh Prime Minister Narendra Modi chuan an party-in state hmasawnnna tur atana a ruahman ṭhenkhat tihhlawhtlin theih lohin a siam niin a sawi bawk.

Association of Democratic Reforms-in inthlan thawh khatnaa candidate te affidavit a zir chianna-ah chuan candidate zinga 301 (56%) te hi pawl 12 pawh pass lo an ni. Hetih lai hian candidate zinga 221 (41%) te chu graduate leh a chung lam an ni thung. CPI(ML) candidate Mira Tanti chu ziak leh chhiar thiam lo a ni a, hetih lai hian post-graduate 59 zinga pahnih chuan doctorate degree an nei thung.