University hna lak tum danah lungawi lo

Democratic Students’ Alliance of Manipur (DESAM) te chuan Pathianni khan Manipur University (MU)-in assis-tant registrar lak tura written test a buatsaih tum dan chu duh lohlan lantirn, test neih hun hi a sawn hla tur leh hriattirna chhuah ṭha leh turin thu neitute an ngen.

DESAM hruaitute chuan Ministry of Human Resource Development hnenah an lungawi loh thu hi an thlen. Mani-pur University vice chan-cellor Prof H Nandakumar Sarma chu a hna zo lo leh duh sak bik nei leh eirukna lakah fihlim lo niin an sawi, chhui chiang tura an phut thu an sawi bawk.

DESAM activist, lung-awi lohna lantirte hi mi 50 vel niin, Pathianni chawhma dar 11.15 khan examination hall-ah an lut a, candidate te answer paper-te an lakhawm a, an tihchhiatsak zui bawk a ni.

Mi 596 te chuan assis-tant registrar lak turah hian written test an nei a, assistant registrar atan hian mi pali lak an ni dawn a, chung zinga pathum chu OBC, SC PWD te tan hauh a ni. Written test hi social science block-ah chawhma dar 11 atangin ṭan a ni a, an ṭan hnu lawk hian dodalna a awm nghal a ni.

DESAM thu puangtu chuan, written test neih chu ti tawpa a hun sawn an duh tih an sawi a, dik lo taka hna lak tumna a awm nia an hriat thu sawiin VC chu mawhphurtu-ah an puh a ni. DESAM te hian tunhnai khan Prime Minister leh Union HRD Minister hnenah he mi chungchangah hian memorandum pawh an lo thehlut tawh a ni.

Manipur University hi kum 1980 khan din a ni a, Central University-ah October 2005 khan hlan kai a ni.