Manipur : Assembly emergency session ko
Manipur-a BJP kaihhruai sorkar chuan Thawhṭanni khan state assembly emergency session koin, Manipur-a tualchhung buaina chhuak mek tihreh leh chinfel dan tur chungchangah resolution pali siamin an pawm nghal bawk.
Manipur assembly-ah hian seat 60 a awm a, seat 10 hi Naga aiawhte tana reserved niin, seat 10 hi Kuki aiawhte tana reserved a ni. Thawhṭannia assembly emergency session-ah hian rorel lai MLA 34 an tel a ni.
Assembly-in resolution a pass hrang hrangte chu -
Resolution pakhatna : Session-in resolution an siam zingah hian helpawlte beihna thleng ṭhin tihtawpna tur; Suspension of Operation (SoO) chu dah hmasak ber niin, state sorkar chuan SoO chu central force-te'n helpawlte an beih let ve-na tur daltu leh inbeihna thlen leh ṭhin chhan niin a sawi. Resolution-ah hian SoO inremna bawhchhia leh midang thahnaa inhnamhnawih ṭhin helpawlte nena inremna awm chu ṭhiah vat ni se tiin an tarlang. Helpawl dang, state sorkar dodal zawnga che ṭhinte nena inremna pawh inremna tawp hun tur; February 29 bak chu pawhsei ni lo se, tiin an rel. Sorkar laipui hian Kuki underground group 25-te SoO hi a ziahpui mek a ni.
Resolution pahnihna : Dan loa ralthuam kawl awm chu tihtawp vek an duh thu an tarlang a, misual pawl emaw, mimal anga dan loa ralthuam lo kawl emaw awmte chu a rang thei ang bera central leh state force-te'n zawng chhuak a, laksak ni se an duh thu an sawi.
Resolution pathumna : Emergency session resolution an siam zingah hian ralthuam nena inbeihna thleng ṭhin tihtawp nan sorkarin ralthuam changkang leh changtlung zawk hmang ve se an duh thu an sawi. State assembly chuan Myanmar-a innghat ralthuam nena che ṭhin helpawl te, India leilunga India mi bei ṭhinte lo beih let nan hian rocket propelled grenade launcher te hman ni se, an ti bawk.
Resolution palina : Resolution an siam zingah hian Manipur-a tualchhung buaina hmun ṭhenkhat, hmun ralṭi zual laiah chuan Assam Rifles te chu an che rangin an che chhuak tam tawk lo nia an ngaih thu an sawi. Hei vang hian state sorkar chuan Assam Rifles-te chu buaina leh inbeihna thlenna hmunah te mawhphurna laa an chet chhuah vat theih nan thupek khauh zawk pek ni se an duh tih an tarlang. Mipui pawisawi lo beihna a thlena lo bei let ve thei tur force dang nen pawh a ṭul chuan thlak mai ni se tih chu resolution an pawm dan a ni. Mipuiin anmahni venghimtu tura ngaihte lak aṭanga beiseina an hloh chhan chu Moreh, Bishnupur, Imphal West leh Kakching-a force awmte'n an chhan loh vang a ni, an ti.
Manipur assembly emergency session-ah hian state sorkar chuan sorkar laipui chu a ṭul ang zela action la tura an duh thu sawiin, sorkar laipui chuan an duh ang chu a tipuitling thei lo a nih chuan state sorkarin mipuite rawn chunga hma an lak mai a ṭul tur thu an sawi.